هەرێم نیوز

نرخی دراو و زێڕ لە بازاڕی ئازادی ئێران بەرزبوونەوەیەکی بێپێشینەی بەخۆیەوە بینی و دۆلاری ئەمەریکی 200 هەزار تمەنی تێپەڕاند؛ ئەم شڵەژانەی بازاڕی دراو هاوکاتە لەگەڵ ئامادەکارییەکان بۆ ڕاگەیاندنی سزای نوێی واشنتن و ڕاگرتنی مامەڵە داراییەکانی ئیمارات لەگەڵ کۆماری ئیسلامیی ئێران.

ئەمڕۆ، نرخی دۆلار لە بازاڕی ئازادی ئێران ژمارەیەکی پێوانەیی نوێی تۆمار کرد و 200 هەزار تمەنی تێپەڕاند.

 هاوکات، نرخی دراوی زێڕی (ئیمامی) گەیشتە 217 ملیۆن تمەن و هەر پاوەندێکی بەریتانیش بە تێپەڕاندنی 270 هەزار تمەن، ژمارەیەکی پێوانەیی تۆمار کرد.

ئەمە لە کاتێکدایە کە ڕۆژی شەممە دۆلار بە 182 هەزار تمەن و دراوی زێڕی ئیمامی بە 208 ملیۆن تمەن مامەڵەی پێوە دەکرا. 

لە سەرەتای هەفتەی ڕابردووشدا، بازاڕی دراو بەهای دۆلاری بە 186 هەزار و 500 تمەن و زێڕی بە 191 ملیۆن تمەن بینیبوو، کە ئەمەش خێرایی بەرزبوونەوەی نرخەکان لە چەند ڕۆژی ڕابردوودا نیشان دەدات.

ئەم ناجێگیرییە توندەی بازاڕی دراو و زێڕ، ڕاستەوخۆ دەکەوێتە ژێر کاریگەریی گوشارە ئابوورییەکان و پێشهاتە سیاسییەکانی دەرەوە. 

بەرزبوونەوەی نرخەکانی ئەمڕۆ، تەنیا یەک ڕۆژ پێش ڕاگەیاندنی پلانی سزاکانی ئەمەریکا دێت. 

بڕیارە ڕۆژی دووشەممە سکۆت بێسێنت، وەزیری گەنجینەی ئەمەریکا، لە کۆنگرەیەکی ڕۆژنامەوانیدا وردەکاریی پلانی "گۆشەگیرکردنی ئابووریی کۆماری ئیسلامی" بە فەرمی بخاتە ڕوو.

سەرباری گوشارەکانی واشنتن، هەفتەی ڕابردوو میرنشینی یەکگرتووی عەرەبی (ئیمارات) ڕایگەیاند کە سەرجەم چالاکییە بازرگانییەکان و مامەڵە داراییەکانی لەگەڵ کۆماری ئیسلامیی ئێران تا کاتێکی نادیار ڕاگرتووە؛ ئەم هەنگاوەش پێدەچێت ڕۆڵێکی بەرچاوی لە دروستبوونی ئەم شۆکە داراییەی دوایی بازاڕی ئێراندا هەبووبێت.