هەرێم نیوز
سەرۆکایەتیی شارەوانیی هەولێر جێبەجێکردنی کۆمەڵێک ڕێنمایی نوێی بۆ ڕێکخستنەوەی سەنتەری شار لە ڕۆژانی هەینیدا ڕاگەیاند، بە مەبەستی کەمکردنەوەی جەنجاڵی و پاراستنی سیمای شارستانیی هەولێر.
دەستپێکردنی هەڵمەتی شارەوانی و ئاگادارکردنەوەی کاسبکاران
ئەمڕۆ هەینی ٣١ی تەممووزی ٢٠٢٦، بەڕێوەبەرایەتیی شارەوانیی یەک لەگەڵ تیمەکانی، دەستیان بە پێدانی ئاگاداری و جێبەجێکردنی ڕێنمایی نوێ لە ڕۆژانی هەینیدا کرد بۆ فرۆشیاران، کاسبکاران و دەستگێڕانی سەنتەری شار، بەتایبەتی ئەوانەی لەسەر شەقامی گشتی و بازاڕەکانی (شێخ مستەفا) و (شێخەڵڵا) کار دەکەن.
بەپێی بەدواداچوونەکانی لیژنەکانی شارەوانی، لە %٨٠ی ئەو دەستگێڕ و کاسبکارانەی کە لەو شوێنانە کار دەکەن هاووڵاتیی بیانین و بەبێ گوێدان بە جوانی، سیمای شار و پاراستنی پاکوخاوێنی، تەواوی شەقامە گشتییەکانیان داگیر کردووە؛ هاوکات لە دوای کارەکانیان زبڵ و پاشماوەیەکی زۆر لە سەنتەری شار جێ دەهێڵن کە ئەوەش ئەرکی تیمەکانی خاوێنکردنەوەی قورستر کردووە.
وەڵامدانەوەی سکاڵای هاووڵاتییان و داوای هاوکاری
ئەم هەنگاوەی شارەوانیی یەک دوای ئەوە دێت کە ژمارەیەکی زۆر لە هاونیشتمانییان سکاڵایان هەبوو لەسەر دروستبوونی ئاستەنگی هاتووچۆ، دانانی کەلوپەل لەسەر شەقام و پیادەڕەوان و دەرفەت نەدان بۆ بازاڕکردنی ئاسوودە، بەتایبەت لە ڕۆژانی هەینیدا.
لە بەرامبەردا، سەرۆکایەتیی شارەوانیی هەولێر داوا لە تەواوی کاسبکاران و فرۆشیاران دەکات هاوکار و پابەندی ڕێنماییەکان بن، تاوەکو پێکەوە بازاڕێکی ڕێکخراو و کەشێکی ئارام بۆ هاتووچۆی هاووڵاتییان و سەرجەم چین و توێژەکان دابین بکرێت.