هەرێم نیوز
بۆردی بانکی نێودەوڵەتی لە واشنتن قۆناغی یەکەمی پێدانی قەرزێکی گەورەی بە عێراق پەسەند کرد، کە تێیدا دوو پڕۆژەی ستراتیژی و گەورەی ڕێگاوبان لە هەردوو پارێزگای سلێمانی و دهۆک لەسەر بوودجەی ئەم قەرزە نێودەوڵەتییە جێبەجێ دەکرێن.
پشکی هەرێمی کوردستان لە قەرزە نێودەوڵەتییەکەدا
ئەمڕۆ هەینی (٥ی حوزەیرانی ٢٠٢٦)، بەپێی ڕاگەیەندراوێکی فەرمیی وەزارەتی ئاوەدانکردنەوە و نیشتەجێکردنی حكوومەتی هەرێمی کوردستان، بۆردی بانکی نێودەوڵەتی لە واشنتن-ی پایتەختی ئەمریکا قۆناغی یەکەمی پێدانی قەرز بە بڕی ٩٠٠ ملیۆن دۆلار بە عێراق پەسەند کردووە.
لە ناو ئەو پڕۆژانەی کە بڕیارە جێبەجێ بکرێن، پڕۆژەکانی وەزارەتی ئاوەدانکردنەوە و نیشتەجێکردنی حكوومەتی هەرێمی کوردستان بە گوژمەی نزیکەی ٨٠ ملیۆن دۆلار لە ناو قەرزەکەدا پەسەند کراون و خراونەتە بواری جێبەجێکردنەوە.
وردەکاریی دوو پڕۆژە ستراتیژییەکەی سلێمانی و دهۆک
وەزارەتی ئاوەدانکردنەوە دەق و شوێنی پڕۆژە پەسەندکراوەکانی بەم شێوەیە دەستنیشان کردووە:
•یەکەم (پارێزگای سلێمانی): پڕۆژەی ئەپگرەید و فراوانکردنی ڕێگای سەرەکیی (سلێمانی-چەمچەماڵ-کەرکووک)، تایبەت بە بەشی (تاسڵوجە بۆ بانی مەقان) بە درێژایی ٥٠ کیلۆمەتر.
•دووەم (پارێزگای دهۆک): پڕۆژەی ئەپگرەید و فراوانکردنی ڕێگای (گرشین-سحێلا) بە درێژایی ٢٢ کیلۆمەتر، لەگەڵ دروستکردنی یەکتربڕی سەرەکیی گرشین.
ئەنجامی هەوڵە بەردەوامەکانی وەزارەت
ڕاگەیەندراوەکە جەختی کردووەتەوە، کە پەسەندکردنی ئەم دوو پڕۆژە گرنگە، دوای هەوڵ و دۆزینەوەی ڕێگای بەردەوامی دانا عەبدولکەریم، وەزیری ئاوەدانکردنەوە و نیشتەجێکردن و تیمی پسپۆڕی وەزارەت دێت.
ئەم سەرکەوتنە نێودەوڵەتییە دوای چەندین سەردانی فەرمی و کۆبوونەوەی چڕ و دانیشتنی تەکنیکی لەگەڵ نوێنەرانی بانکی نێودەوڵەتی هات، کە دواجار توانرا ئەم دوو دەمارە سەرەکییەی هاتوچۆ لە هەرێمی کوردستان بخرێنە ناو بەرنامەی گەشەپێدانی بانکی نێودەوڵەتییەوە، کە هۆکارێکی سەرەکی دەبێت بۆ کەمکردنەوەی ڕووداوەکانی هاتوچۆ و بووژانەوەی بازرگانی لە ناوچەکەدا.