هەرێم نیوز
لە کاتێکدا پڕۆسەی کۆکردنەوەی چەک لە دەستی دەوڵەتدا لە بەغدا چووەتە قۆناغێکی جیددییەوە، گرووپە چەکدارە سەرکەشەکان هاتوونەتە دەنگ؛ گوتەبێژی کەتایبی سەیدولشوهەدا هۆشداریی توند دەداتە دەسەڵاتداران و ڕایدەگەیەنێت، هەر هەوڵێک بۆ چەککردنی ئەوان بە ڕووخانی حكوومەتەکەی عەلی زەیدی کۆتایی دێت.
هەڕەشەی ڕووخاندنی حكوومەتی بەغدا
ئەمڕۆ هەینی (٥ی حوزەیرانی ٢٠٢٦)، کازم فەرتووسی، گوتەبێژی فەرمیی کەتایبی سەیدولشوهەدا لە میانی چاوپێکەوتنێکی تەلەفیزیۆنیدا، بە توندی هێرشی کردە سەر پڕۆژەی نوێی حكوومەت بۆ داماڵینی چەکی گرووپەکان و ڕایگەیاند: "ئامۆژگاریی ئێمە بۆ دەسەڵاتداران ئەوەیە واز لە هەوڵی چەککردنی گرووپەکان بهێنن، چونکە ئەم کارە تەنها تووشی شکست و شەرمەزارییان دەکات و لە کۆتاییدا حكوومەتەکەی خۆشیان دەڕووخێنێت."
فەرتووسی جەختی کردەوە کە پێویستە دەسەڵاتدارانی بەغدا "عێراقی و نیشتمانی بن" و تێبگەن کە چەکی گرووپەکانی مقاوەمە بەشێکە لە شکۆ و سەروەریی نیشتمان، نەک بارگرانی لەسەر دەوڵەت.
هێرشکردنە سەر سوپای عێراق لە شەڕی داعشدا
گوتەبێژی کەتایبی سەیدولشوهەدا لە درێژەی قسەکانیدا هێرشی توندی کردە سەر پێکهاتەی فەرمیی سوپای عێراق و وتی: "دەبێت دەسەڵاتداران ئەوەیان لەبیربێت کێ لەسەر زەوی بەڕووی داعشدا وەستایەوە؛ سوپای عێراق لەو کاتەدا سەرکردایەتیی نەبوو، نەیتوانی بەرگری لە خاکەکە بکات و بەزی، بەڵکو ئەم گرووپە چەکدارانە بوون هاتن و وڵاتیان لە دەستی داعش ڕزگارکرد."
ئاماژەی بەوەش کرد، ئەو هێزەی کە ڕاهێنانی بە حەشدی شەعبی کردووە و ئەم پێکهاتەیەی ئێستای دروستکردووە، هەر خودی ئەم گرووپە چەکدارانە بوون کە سەرکردایەتیی مەیدانیی شەڕەکەیان دەکرد.
کشانەوەی ئەمریکا لە عێراق بە "خەیاڵ" ناو دەبات
لەسەر دۆسیەی مانەوەی هێزەکانی ئەمریکا لە عێراق، کازم فەرتووسی ڕێککەوتنی نێوان بەغدا و واشنتنی بە توندی ڕەتکردەوە و ڕایگەیاند: "کشانەوەی هێزەکانی ئەمریکا لە مانگی ئەیلولی داهاتوودا تەنها خەیاڵە؛ تەنها کەسانی گەمژە متمانە بە لێدوان و بەڵێنەکانی ئەمریکا دەکەن."
فەرتووسی لە کۆتاییدا جەختی کردەوە، ئەگەر لە ڕابردووشدا جۆرە کشانەوەیەکی هێزەکانی ئەمریکا لە عێراق ڕووبدات، ئەوا تەنها بەهۆی زەبری چەکی مقاوەمە و گوشارە سەربازییەکانی ئەوانەوە دەبێت، نەک لەسەر بنەمای ڕێککەوتننامە دیپلۆماسییەکانی نێوان بەغدا و واشنتن.
ئەم پێشهاتە و لێدوانە توندانەی سەیدولشوهەدا، نیشانیدەدات کە بڕیارەکەی چوارچێوەی هەماهەنگی و حكوومەت بۆ کۆکردنەوەی چەک، شەقامی سیاسی و سەربازیی شیعەی بە تەواوی دابەشکردووە، بەتایبەت دوای ئەوەی گرووپەکانی وەک عەسائیبی ئەهلی حەق و سەرایا سەلام ئامادەیی خۆیان بۆ چەکدانان نیشاندا، بەڵام گرووپەکانی سەر بە بەرەی ڕادیکاڵ هێشتا بە توندی دژی دەوەستنەوە.