هەرێم نیوز
وەزیری گەنجینەی ئەمریکا ڕایگەیاند، وڵاتەکەی بە فەرمی دەستی بەسەر نزیکەی یەک ملیار دۆلاری ئەمریکی لە دارایی و دراوە دیجیتاڵییە رمزگۆڕدراوەکانی (کریپتۆکەرەنسی) کۆماری ئیسلامیی ئێراندا گرتووە.
ئەمڕۆ هەینی، ٢٩ـی ٥ـی ٢٠٢٦، سکۆت بسێنت، وەزیری گەنجینەی ئەمریکا ئاشکرای کرد کە تیمە تەکنیکی و داراییەکانی حکومەتی فیدراڵ، لە چوارچێوەی چاودێریکردنی توندی سەرچاوە داراییەکانی تاران و ڕێگریکردن لە دەربازبوون لە سزاکانی واشنتن، توانیویانە شوێنپێی ئەم بڕە پارە زەبەلاحەی ئێران لە ناو تۆڕە دیجیتاڵییەکاندا هەڵبگرن و بە تەواوی دەستی بەسەردا بگرن.
بسێنت ئاماژەی بەوەش کرد، ئێران لە ماوەی ڕابردوودا دراوە دیجیتاڵییەکانی وەک ئامرازێک بۆ تێپەڕاندنی گەمارۆ ئابوورییە نێودەوڵەتییەکان و دابینکردنی پێداویستییە داراییە دەرەکییەکانی بەکارهێناوە.
ئەم هەنگاوە نوێیەی وەزارەتی گەنجینە، وەک لێدانێکی ستراتیژیی قورس لە سیستەمی دارایی سێبەری ئێران سەیر دەکرێت و توندکردنەوەی زیاتری گەمارۆکانی سەر تاران لە جیهانی دیجیتاڵیدا نیشان دەدات.