هەرێم نیوز
بەڕێوەبەریایەتی هاتووچۆی پارێزگای سلێمانی، بە مەبەستی پاراستنی گیانی هاوڵاتیان و کەمکردنەوەی ڕووداوەکان لە ڕۆژانی جەژنی نەورۆز و جەژنی ڕەمەزاندا، زنجیرەیەک ڕێنمایی نوێی بۆ شۆفێران بڵاوکردەوە و جەختی لە سزادانی سەرپێچیکاران کردەوە.
هۆشداریی توند؛ سویچ مەدەنە دەستی منداڵەکانتان
یەکێک لە خاڵە هەرە گرنگەکانی ڕێنماییەکەی هاتووچۆ، ڕووی دەمی لە دایکان و باوکانە:
• لێخوڕین بێ مۆڵەت: داوا دەکرێت بە هیچ شێوەیەک ئۆتۆمبێل نەدرێتە دەست ئەو کوڕ و کچانەی مۆڵەتی شۆفێرییان نییە، چونکە بەپێی بەشی ٢١ لە یاسای هاتووچۆ، ڕێکاری یاسایی توند بەرامبەر سەرپێچیکار دەگیرێتە بەر.
پوختەی ڕێنماییەکەی هاتووچۆی سلێمانی:
١. سەلامەتیی گشتی:
• بەکارهێنانی پشتوێنی دڵنیایی بۆ شۆفێر و سەرنشینان ناچارییە.
• بەکارهێنانی مۆبایل لە کاتی شۆفێریدا بە هەموو شێوەیەک قەدەغەیە.
• شۆفێریکردن لە ژێر کاریگەریی مەی (خواردنەوە کحولییەکان) ڕێکاری یاسایی بەدوای خۆیدا دەهێنێت.
٢. ڕێکارەکان لە شوێنە گشتییەکان:
• مەفرەزەکانی هاتووچۆ لەبەردەم گۆڕستانەکان، شوێنە گەشتیارییەکان و سەیرانگاکان دابەش دەبن بۆ ڕێکخستنی هاتووچۆ.
• پارککردنی ئۆتۆمبێل بە شێوەی نادروست لێپرسینەوەی یاسایی لەگەڵ دەکرێت.
• کامێراکانی چاودێریی خێرایی لە ناوشار و دەرەوەی شار بە بەردەوامی لە کاردا دەبن.
٣. ماتۆڕسکیل و بارهەڵگرەکان:
• شۆفێرانی ماتۆڕسکیل دەبێت پابەندی خێرایی، ترافیک و بەکارهێنانی کڵاوی پارێزەر بن.
• سەرخستنی منداڵ لە بەشی پشتی بارهەڵگر و ماتۆڕسکیل قەدەغەیە و دەست بەسەر سوارڕەوەکەدا دەگیرێت.
• لە ڕۆژانی ٢١ و ٢٢ و ٢٣ی مانگ، هاتنی بارهەڵگر بۆ ناو سەنتەری قەزای دوکان قەدەغەیە.
هێڵی گەرم بۆ هاوکاری
بەڕێوەبەرایەتی هاتووچۆی سلێمانی داوا لە شۆفێران دەکات لە کاتی هەر ڕووداوێکی نەخوازراو یان بۆ هەر پێویستییەک، پەیوەندی بە هێڵی گەرمی ١٨٨ بکەن.