هەرێم نیوز
سەرۆکی فەرمانگەی تەکنەلۆژیای زانیاریی حکومەتی هەرێم ڕەتیدەکاتەوە دەستکاریی مووچەی فەرمانبەران بکرێت و دڵنیایی دەدات کە وردبینیی لیستی مانگی یەک لەلایەن بەغداوە تەواو بووە و "هیچ کێشەیەکی نییە".
ئەمڕۆ سێشەممە 3ی 2ی 2026، هیوا ئەفەندی، سەرۆکی فەرمانگەی تەکنەلۆژیای زانیاریی حکومەتی هەرێمی کوردستان لە لێدوانێکدا ڕایگەیاند، لیستی مووچەی مانگی یەک لەلایەن بەغداوە وردبینی بۆ کراوە و هیچ کێشەیەکی تێدا نەبووە.
سەبارەت بەو دەنگۆیانەی باس لە بڕینی 3%ـی مووچە دەکەن بۆ قەرەبووکردنەوەی مانگەکانی 11 و 12، هیوا ئەفەندی هەواڵەکەی ڕەت کردەوە و وتی: "هەر مانگێک حیسابی خۆی هەیە، کاتێک بەغدا پارەی مانگەکانی 11 و 12ی نەناردووە، ناکرێت ئێستا پارە لە خەڵک ببڕین بۆ ئەوەی بیدەین بە ئەوان، ئەمە ڕاست نییە."