هەرێم نیوز
ڕۆژنامەی "الشرق الاوسط" لە ڕاپۆرتێکدا بڵاویکردەوە، حکومەتی عێراق و لایەنە سیاسییە دەستڕۆیشتووەکانی ئەو وڵاتە لە ماوەی دوو هەفتەی ڕابردوودا دوو پەیامی هۆشدارییان پێگەیشتووە؛ یەکێکیان لە وڵاتێکی عەرەبی و ئەوی تریان لە دەزگایەکی هەواڵگریی ڕۆژئاواییەوە، کە ئاماژەی "جیدی"یان تێدایە بۆ هێرشی سەربازیی نزیک و بەرفراوان لە ناوخۆی عێراقدا.
بەگوێرەی ڕاپۆرتەکە، بەرپرسێکی عێراقی پشتڕاستی کردووەتەوە کە "وڵاتێکی دۆست" بەغدای لەم هەڕەشانە ئاگادار کردووەتەوە، ئەمەش بووەتە هۆی ئەوەی لایەنە شیعەکان بە خێرایی بەرەو پێدانی ئیمتیازات هەنگاو بنێن.
سەرچاوە ئاگادارەکان بە ڕۆژنامەکەیان ڕاگەیاندووە کە ئامانجەکانی ئەم هەڕەشانە ئەمانەن:
- دامەزراوە حکومییەکانی پەیوەست بە لایەنە شیعەکان و هێزەکانی حەشدی شەعبی.
- کەسایەتییە دەستڕۆیشتووە دارایی و سەربازییەکان.
- شوێن و کۆگاکانی درۆن و مووشەک و سەربازگەکان.
لە لایەکی ترەوە، لە ئازاری ٢٠٢٥دا، پەرلەمانی عێراق ڕەشنووسی یاسایەکی بۆ چاکسازی لە حەشدی شەعبی و تێکەڵکردنی تەواوەتی بە پێکهاتەی ئەمنیی دەوڵەت پێشکەش کرد.
یەکێک لە بڕگە سەرەکییەکانی ئەم یاسایە، دانانی فەرمی حەشدی شەعبییە لەژێر فەرمانی سەرۆکوەزیران (فەرماندەی گشتی هێزە چەکدارەکان)، هەنگاوێک کە بە ئاشکرا ئەم گرووپە لە ژێر هەژموونی دەرەکی، بەتایبەتی ئێران، دوور دەخاتەوە.
الشرق الاوسط ئاماژەی بەوەش کردووە، وا بڕوا دەکرێت ئەم دوو هۆشدارییە بووبنە هۆی خێراکردنی ئەو بەیاننامە سیاسییانەی دوایی کە لایەنەکان تێیدا داوای "قۆرخکردنی چەک لە دەستی دەوڵەتدا" دەکەن.
ئاستی هەڕەشەکان سەرەتا بە پەیامێکی وڵاتێکی عەرەبی (کە پەیوەندی باشی لەگەڵ واشنتن و تاران هەیە) دەستی پێکرد، کە هۆشداری دابوو بەغدا بە شێوەیەکی مەترسیدار لە لێواری هێرشێکی سەربازی خێرایە، هاوشێوەی ئەو هێرشەی کرایە سەر مەکتەبی سیاسی حەماس لە دەوحە لە ئەیلوولی ٢٠٢٥دا.
بەپێی هەندێک سەرچاوەی ناوخۆیی، لە چەند ڕۆژی ڕابردوودا بەشێک لە گروپە چەکدارەکان دەستیان کردووە بە گۆڕینی شوێنی کۆگاکانی چەک و درۆنەکانیان لە ناوچە ئاوەدانەکانەوە بۆ ناوچە دەشتاییەکان (وەک جەزیرەی ئەنبار و سنوورەکانی سوریا)، ئەمەش نیشانەی ئەوەیە کە هۆشدارییەکەی "وڵاتە دۆستەکە"یان بە جیدی وەرگرتووە.
ئەم پێشهاتانە نیشان دەدەن کە عێراق لە ساڵی ٢٠٢٦دا لەبەردەم تاقیکردنەوەیەکی قورسدایە؛ یان دەبێت بە تەواوی بگەڕێتەوە ناو چوارچێوەی دەوڵەت و خۆی لە ململانێی میحوەرەکان بەدوور بگرێت، یان ڕووبەڕووی هێرشێک دەبێتەوە کە نەک تەنیا گروپە چەکدارەکان، بەڵکو ژێرخانی دارایی و سیاسی وڵاتەکەش دەهەژێنێت.