هەرێم نیوز
هێرشەکەى سەر کۆرمۆر فشارێکی زیاتر دەخاتە سەر میلشیاکان و هەنگاوەکانى حکومەتى عێراقى لەبەرامبەریان خێراتر دەکات ئەنجامدەرەکانى هەرکێ بن، ئەمە بۆچوونى بەشێکى زۆر لە شرۆڤەکارانە کە پێیان وایە کابینەى نوێی حکومەت یەکێک لە ئەرک و ئاڵنگارییە سەختەکانى بەردەمى کۆتایی هێنانە بەو پاشا گەردانییە سەربازیی و چەکدارییەى کە لەعێراقدا لەبەرژەوەى ئێران هەیە، هەربۆیە ئەم پاساوە (ئەگەر راستەقینەش نەبێت) هەلێکى زێڕینە بۆ ئەوەى دەست ببرێت بۆ وەها دۆسیەیەک و کاتى ئەوەیە ئەو دومەڵە گەورەیەى سەر سییەکانى عێراق بتەقێنرێت، دواجار لێکەوتەکانى چی دەبن بابەتێکى دیکەیە.
سەرچاوەکان ئاماژە بەوە دەکەن دوو لەو کەسانەى کە سەردانى کێڵگەى کۆرمۆریان کردووە (حەمید شەتری و عەبدولئەمیر شەمەریی) قسەیان لە بارەوە هەیە کە ناویان بخرێتە بەردەست بۆ ئەوەى ببنە سەرۆکوەزیرانى داهاتووى عێراق، ئەوە لە کاتێکدا زۆرینەى چاوەکان لەسەر (قاسم ئەعرەجی) بوو کە راوێژکاری ئاسایشى نیشتمانی عێراقە ئامادە ببێت بەو پێیەى کە زۆرینەى لیژنە لێکۆڵینەوە ئەمنی و سەربازییەکانى عێراق خۆی سەرۆکایەتى کردووە، بەڵام بۆ گۆڕی گومە پێویستى بە وەڵامە، هەرچەندە پێشووتر رایگەیاندووە کە دەبێت حکومەت ناسنامەى ئەنجامدەرانى ئەو هێرشە بدۆزێتەوە و بۆ رای گشتى رابگەیەنێت، گوتەبێژى حکومەتیش بەڵێنى دا لە ماوەى 72 کاتژمێردا تاوانباران بدۆزنەوە.
چوارچێوەى هەماهەنگی شیعەکان پشتیوانى خۆیان بۆ محەمەد سیاع سودانى دووپاتکردووەتەوە، هەرچەندە بەشێکی زۆریان نایانەوێت جارێکی دیکە ببێتەوە بەسەرۆکوەزیران، سەرەڕای ئەوەى لە هەڵبژاردنەکانی پێشوودا دەنگێکی زۆر باشى بەدەستهێناوە، ئەم پشتیوانییەى چوارچێوەى هەماهەنگی لە بەیاننامەکەیاندا بۆ ئەوەیان گەڕاندووەتەوە کە ئەو جۆرە کردەوە و هێرشانە دەبێتە لەمپەر لەبەردەم رەوتى پێشکەوتنەکانى عێراق و بۆ رووبەڕووبوونەوەشیان پێویستى بە یەکهەڵوێستى هەموو لایەنەکان هەیە.
شارەزایانى سەربازیی و ئەمنی ئاماژەیان بەوە کردووە هێرشبەرەکان شارەزاییەکی زۆریان هەبووە لە چۆنیەتى ئەنجامدانى هێرشە و دیارکردنی ئامانجەکە و پێکانى بەو شێوە وردە، ئەمانەش دەرخەری ئەو راستییەن کە ئەو لایەنە راهێنانى قورسیان ئەنجامداوە و توانایەکی باشیشیان لەو بوارەدا هەیە، لەبەر ئەوەی بەو هێرشە جگە زیانە مادییە زۆرەکەى نزیک لە 80%ـی کارەباى کوردستانى کوژاندەوە.
ئەوەى تا ئێستاش ئاشکرا کرابێت و لایەنەکان جەختی لەسەر بکەنەوە هێرشەکە لە نزیکی کێڵگەى کۆرمۆرەوە ئەنجامدراوە، دۆزینەى ئەو لایەنەش کە هێرشەکەى ئەنجامداوە دەکەوێتە ئەستو و بەرپرسیارێتى حکومەتى ناوەندیی، بابەتەکەش لەوەدا خۆی دەبینێتەوە کە ناکرێت ئەم هێرشەش وەک هێرشەکانى پێشوو مامەڵەیان لەگەڵ بکرێت و ئەنجامەکانى لێکۆڵینەوەش (دیزە بە دەرخۆنە) بکرێت و بێدەنگییان لێبکرێت، لەبەر ئەوەى هەمووان کۆکن لەسەر ئەوەى هەلێکی باش هاتووەتە پێشەوە بۆ ئەوەى لەو رێگەیەوە کۆتایی بە میلشیاى شیعەى نزیک لە ئێران بهێنرێت، ئەوە لە کاتێکدا (عەسائیبی ئەهلی حەق) بە پێچەوانەى زۆرینەى گروپەکانى دیکەوە بەیاننامەى دەرکردووە و وێڕاى سەرکۆنەکردنى داواەى (لێکۆڵینەوەى نیشتمانی) دەکەن بۆ بابەتەکە و بەکارهێنانى ئەو دەستەواژەیەش واتە دوور بێت لە دەستێوەردانى دەرەرکی و مەبەستیشیان ئەمریکا و رۆژئاواییەکانە.
مارک ساڤایاى نوێنەری تایبەتى دۆناڵد ترەمپ یش رایگەیاند عێراق شوێنى ئەو جۆرە گروپانە نییە کە هێرشی لەو جۆرە ئەنجام بدەن، کارى نایاسایی بکەن و ئەجێنداى دەرەکی لە عێراق جێبەجێ بکەن، چوون ئەم جۆرە کارانە ئارامی عێراق تێکدەدات و هەڕەشەش بۆ سەر بەرژەوەندییەکانى ئەمریکا لە عێراق دروست دەکات، بۆیە دەبێت بەخێرایی ئەو بابەتە یەکلایی بکرێتەوە.
رەمزی ماردینى دامەزرێنەری کۆمپانیاى جیۆبۆڵ لابز بۆ راوێژکاریی جێۆسیاسی لە رۆژهەڵاتى ناوەڕاست رایگەیاندووە ئەنجامدانی ئەو هێرشە لەکاتێکدایە کە چەند رۆژێکی ماوە بۆ کردنەوەى گەورەترین کۆنوسڵخانەى ئەمریکا لە هەولێر پەیامێکی راستەوخۆیە و گومانیشم نییە کە ئێرانییەکان ئاگایان لەو بابەتە هەیە و لەو رێگەیەوە پەیامیان بۆ ئەمریکا و هەرێمی کوردستانیش ناردووە، ئەوە لەکاتێکدا کۆنسوڵی گشتى ئێرانیش لە هەولێر ئیدانەی هێرشەکەى کردووە..
لەگەڵ ئەوەشدا بەشێک لە میدیاکان ئاماژەیان بەوە کردووە ئەو درۆنەى لە هێرشەکەدا بەکارهاتووە لە جۆری (میعراج 532)ـە کە لە لایەن سوپاى پاسدارانى ئێرانەوە دروستکراوە و بەیەکێک لە گرنگترین و بەهێزترین درۆنەکانى جیهان دادەنرێت لە پێکانى ئامانج و توانى هەڵگرتنى 450 کیلۆی هەیەو دەتوانێت لەبەرزایی 12 هەزار پێوە بفڕێت و بۆ ماوەى 3 کاتژمێر لە ئاسماندا بمێنێتەوە.