هەرێم نیوز
هەندێک لە ئیسرائیلی و عەرەبییەکان باسیان لەوە کردووە کە فڕۆکە جەنگییەکانی ئیسرائیل بەسەر ئاسمانی عێراقدا دەسوڕێنەوە، ئەمەش نیگەرانییەکانی لەبارەی گرژییەکانی لەگەڵ ئێراندا دروستکردووە و ئامانجی ئەو گەشتانەش ئۆپەراسیۆنێکی دەروونی پلان بۆ داڕێژراوە.
ماڵپەڕی "کلوزادۆرز"ی ئیسرائیلی لە ڕاپۆرتێکی ئەم دواییەدا، بەبێ ئەوەی دیاریکردنی وادەی هاتنی ئەو فڕۆکە جەنگییانە، نووسیویەتی، فڕۆکە جەنگییەکانی ئیسرائیل چوونەتە ئاسمانی عێراق و لە نزیک سنوورەکانی ئێرانەوە فڕیون، کە ئەم گەشتانە بە پاڵپشتی کەشتیی سووتەمەنی ئەمریکا ئەنجامدراون، هەروەها دەنگی بەرز لە چەند ناوچەیەکی عێراق بیستراوە.
بەپێی ڕاپۆرتەکە، سەرچاوە ئاگادارەکان ڕایانگەیاندووە، مەرج نییە مەبەست لەم گەشتانە ئۆپەراسیۆنێکی دەستبەجێ بێت، بەڵکو دەکرێت "ئۆپەراسیۆنێکی دەروونی پلان بۆ داڕێژراو" بێت بۆ دروستکردنی سەرلێشێواوی و کەمکردنەوەی هەستیاری سیستەمی فەرماندەیی و بەرگری ئێران.
بە وتەی ئەو میدیا ئیسرائیلییە، ئەم شێوازە هاوشێوەی ئەو کردارانەیە کە پێش هێرشی پێشووی ئیسرائیل بۆ سەر ئامانجەکان لە ئێران باسکراوە؛ ئەو کارانەی کە بریتی بوون لە گەشتە دووبارەبووەکانی نزیک لە سنووری ئێران لە ماوەی چەند هەفتەیەکدا بۆ "ئاساییکردنەوەی" بوونی فڕۆکەی جەنگی بەم ئاراستەیە.
ئەو دەزگایە میدیاییە دەشڵێت، ڕۆڵی فڕۆکەی سووتەمەنیهەڵگری ئەمەریکا لەم ئۆپەراسیۆنەدا گرنگە بەتایبەتی، چونکە فڕینی فڕۆکە بۆ قوڵایی خاکی عێراق بەبێ سووتەمەنی ئاسمانی مومکین نییە و ئەم پاڵپشتیەش دەکرێت نیشانەی ڕەزامەندی بێدەنگ یان ئاسانکاری بۆ ئۆپەراسیۆنەکە بێت لەلایەن ئەمریکاوە، ئەمەش ڕێگە بە فڕۆکە جەنگییەکانی ئیسرائیل دەدات تەقەمەنی زیاتر هەڵبگرن و زیاتر لە ناوچەکە بمێننەوە.
لە ئێران، پرسی فڕینی گوماناوی لە ئاسمانی عێراقدا کاتێک هاتە ئاراوە کە هەواڵی دەنگێکی بەرز لە تاران بیسترا. دەزگای میدیایی ئیرەم نیوز بە زمانی عەرەبی بە پشتبەستن بە سەرچاوە سەربازییەکانی ئێران بڵاویکردەوە، هێزی ئاسمانی ئێران ڕایگەیاندووە کە ئەو دەنگە بەهۆی فڕینی فڕۆکەیەکی شەڕکەری میگ-٢٩ بووە کە لە چوارچێوەی ئەرکەکانی ڕۆژانەی ئەمنیەتی ئاسمانیدا دەسوڕێتەوە.
بەڵام شرۆڤەکاران بە میدیاکەیان ڕاگەیاندووە کە کەشی گشتی ئێران لە دوای شەڕی ١٢ ڕۆژەی ئەم دواییەی نێوان ئێران و ئیسرائیل لە ڕادەبەدەر هەستیار بووە بەرامبەر بە هەر جوڵەیەکی ئاسمانی.
شرۆڤەکاری سەربازی یەدوڵڵا کەریمی پوور لە چاوپێکەوتنێکدا لەگەڵ ئیرەم نیوز هۆشداریدا لەوەی کە دووبارەکردنەوەی ئەم شێوازە دەتوانێت ببێتە هۆی “کەمبوونەوەی هەستیاری بەرگرییەکانی ئێران”.
سەرەڕای ڕوونکردنەوە فەرمییەکان لە تاران کە گەشتە سەربازییەکان ئاساییە، بەڵام زیادبوونی جموجۆڵە ئاسمانییەکانی ئیسرائیل لە نزیک سنوورەکانی ئێران، شرۆڤەکاران هۆشداری دەدەن لەوەی ناوچەکە چووەتە قۆناغێکی نوێی گرژی و ناسەقامگیرییەوە، قۆناغێک کە هەر ڕووداوێکی بچووک دەتوانێت لێکەوتەی گەورەی لێبکەوێتەوە.