هەرێم نیوز
سەرۆک کۆماری عێراق له بەغدا پێشوازی لە سەرۆکی دادگای باڵای فیدراڵی كرد جەختی کردەوە لەسەر دۆزینەوەی چارەسەری کۆتایی بۆ خەرجکردنی پارەی موچه‌ی فەرمانبەرانی هەرێم و چارەسەرکردنی ئەم پرسە مرۆییە بەپێی دەستور و یاسا و بڕیارەکانی دادگای فیدڕاڵی، هەروەها تیشکی خستە سەر پابەندبونی سەرۆکایەتی کۆمار بە جێبەجێکردنی دەستور و پابەندبون بە بڕگەکانی و پاڵپشتیکردنی دەسەڵاتی دادوەری.
ئەمڕۆ یەکشەممە، سەرۆک کۆمار د. لەتیف ڕەشید، پێشوازی لە جاسم محەمەد، سەرۆکی دادگای فیدراڵی کرد لە بەغدا.
لە دیدارەکەدا باسیان لە پتەوکردنی سەروەری یاسا و سەربەخۆیی دەسەڵاتی دادوەری کرد کە زامنی چارەسەرکردنی هەموو ناکۆکیەکانە.
سەرۆک کۆمار جەختی لە پێویستی دۆزینەوەی چارەسەری کۆتایی بۆ خەرجکردنی شایستە داراییەکانی فەرمانبەرانی هەرێمی کوردستان و چارەسەرکردنی ئەم پرسە مرۆییە بە پێی دەستوور و یاسا و بڕیارەکانی دادگای فیدراڵی کردەوە.
هەروەها تیشکی خستە سەر کارەکانی سەرۆکایەتی کۆمار و پابەندبوونی بە جێبەجێکردنی دەستوور و پاڵپشتیکردنی دەسەڵاتی دادوەری.
هەر لەو دیدارەدا، جاسم محەمەد جەختی لە جێبەجێکردنی ئەرکەکانی دادگای فیدراڵی بەپێی دەستوور و یاسا و دەستەبەرکردنی بەرژەوەندی و مافەکانی خەڵک و پتەوکردنی یەکێتی نیشتمانی کردەوە.
دووپاتیشیکردەوە کە دەبێت قەیرانی مووچەی فەرمانبەرانی هەرێمی کوردستان بەپێی یاسا چارەسەر بکرێت.