هەرێم نیوز

وەزارەتی خەزێنەی ئەمریکا ڕایدەگەیەنێت، ژمارەیەك سزای نوێی پەیوەست بە ئێرانی پەسەندكردوە کە 10 کەس و 27 كۆمپانیا و دامەزراوە لە خۆدەگرێت كە بەشێكیان لە ئیمارات و هۆنگ کۆنگن.

نوسینگەی کۆنترۆڵی سەروەت و سامانی دەرەکی لە وەزارەتی خەزێنەی ئەمریکا، ئەمڕۆ هەینی لە ڕاگەیەندراوێكدا كە لە ماڵپەڕی فەرمیی خۆیدا بڵاوكردوەتەوە و تێیدا هاتوە، ژمارەیەك سزایان سەپاندوە كە کەسان و کۆمپانیاکانی ئێران، ئیمارات، چین، شانشینی یەکگرتو و هۆنگ کۆنگ دەگرێتەوە.

ئاماژەی بەوەشكردوە، سزاکان 10 کەسی کردوەتە ئامانج کە هەندێکیان خاوەنی دو ڕەگەزنامە بون، کە چالاکییەکانیان لە تاران و شارەکانی دیکەی ئێران و هەروەها لەندەن و دوبەی ئەنجامداوە.

بەگوێرەی فەرمانی جێبەجێکاری وەزارەتی گەنجینەی ئەمریکا، سەرجەم ئەو کەسانەی کە سزایان بەسەردا سەپێنراوە، لەلایەن واشنتنەوە تۆمەتبارن بەوەی کە بەشداری لە چالاکییە نایاساییەکان دەکەن بۆ پشتیوانیکردن لە ئێران.

جگە لەوەش سزاکانی ئەمریکا، 27 دامەزراوەی بازرگانی چەندین وڵاتی گرتوەتەوە کە بەشێکیان لە ساڵی 2024 تۆمارکراون، ئەوەش ڕەنگدانەوەی بەردەوامی چالاکییەکانە سەرەڕای سزاکانی پێشوو.

بەگوێرەی ڕاگەیەندراوەكە، ئەو كەس و دامەزراوانەی كە سزادراون، چالاكییەكانیان بریتی بوە لە بازرگانی گشتی، پترۆکیمیایی، گواستنەوەی پارە و خزمەتگوزاری لۆجستی.

سەپاندنی سزاكان لەكاتێكدایە، گفتوگۆكانی نێوان ئەمەریكا و ئێران كە بەشێوەی ناڕاستەوخۆ بەڕێوەدەچوون، بەهۆی خواستی ئێران بۆ دەستبەردار نەبوون لە پیتاندنی یۆرانیۆم راگیراون.
تا ئێستا ئێران و ئەمەریكا پێنج خولی دانوستاندنیان بەڕێكردووەك كۆتایی هاتنی گەڕی پێنجەمی دانوستانەكان لەكاتێكدایە، ئەمەریكا داوا لە ئێران دەكات، بەتەواوەتی پیتاندنی یۆرانیۆم رابگرێت، ئەمەش وەك پێشهەنگاوێك بۆ رێگری بەدەستهێنانی چەكی ئەتۆمیی لەلایەن ئێرانەوە بەشێوەیەكی هەمیشەیی.
بەڵام ئێران ئەم داواكارییە رەتدەكاتەوە، هەرچەندە ئامادەیی خۆی پیشانداوە بۆ دانانی سنور بۆ بەرنامە ئەتۆمییەكەی و رێگەدان بە گرتنەبەری چەند رێوشوێنێك بۆ چاودێریكردنی.
سێ هەفتە لەمەوبەر، دۆناڵد ترەمپ سەرۆكی ئەمەریكا رایگەیاند، پێشنیازێكیان داوەتە ئێران بۆ بەردەوامیی گفتوگۆكان سەبارەت بە بەرنامە ئەتۆمییەكەی.

رێككەوتنامەی ئەتۆمی ئێران كە لەنێوان وڵاتانی بەریتانیا، ئەڵمانیا، چین، روسیا، ئەمەریكا، فەرەنسا و ئێران لە ساڵی 2015 ئەنجامدرا، بووە هۆی سوككردنی بەشێك لە گەمارۆ و سزاكانی سەر ئێران لەبەرامبەر سەپاندنی مەرج و كۆتوبەند بەسەر بەرنامە ئەتۆمییەكەی تاران.

دۆناڵد ترەمپ سەرۆكی ئەمەریكا لە ویلایەتی یەكەمی سەرۆكایەتی لە ئایاری 2018 تاكلایەنە لە رێككەوتنەكە كشایەوە و سزاكانی لەسەر ئێران قورستر كرد.

دوای گەڕانەوەی بۆ كۆشكی سپی ئەمەریكا لەسەرەتای ئەمساڵ، دۆناڵد ترەمپ سیاسەتی ئەوپەڕی فشاری لەسەر ئێران خستەكار و دواتر دانوستان و گفتوگۆی نێوانیان بە نێوەندگیریی شانشینی عوممان دەستی پێكردەوە.