هەرێم نیوز
كۆمەڵی دادگەریی كوردستان ڕایگەیاند: "مووچەخۆران بەبێ پارە ئەم جەژنەیان بەڕێ دەکەن ".
كۆمەڵی دادگەریی كوردستان رایگەیاند: " سەبارەت بە پێنەدان و دابەشنەكردنی مووچەی مووچەخۆرانی هەرێم، ئەنجومەنی سەركردایەتیی كۆمەڵی دادگەری بە نیگەرانییەوە لە دۆخی مووچەخۆرانی ڕوانی و ڕایگەیاند، كە لەم بەرە جەژنانەدا قەیرانی مووچە بۆ مووچەخۆران خولقێنراوە".
گووتی: "بارودۆخێكی سەختیش خراوەتە بەردەمیان، كە ئاماژەكان بۆ ئەوەن مووچەخۆران بەبێ پارە ئەم جەژنەیان بەڕێ بكەن، ئەم قەیرانەش دەسەڵاتدارانی بەغدا لێی بەرپرسن".
دەشڵێت: "لە شەڕی سیاسی و هەڵبژان دواجار هەر هاووڵاتیان لەو نێوەندەدا دەبنە قۆچی قوربانی و باجەكەی دەدەن، دەبێت دەسەڵاتدارانی عێراق چارەسەر بكەن و پابەند بن بە بڕیاری دادگای فیدڕاڵی و یاسای بوودجەی عێراقەوە".