هەرێم نیوز
سەرۆکوەزیرانی عێراق و سەرۆککۆماری فەڕەنسا پەیوەندییەکی تەلەفۆنییان ئەنجامدا و پرسی هەوڵەکانی ڕاگرتنی جەنگیان لە فەلەستین و لوبنان و یارمەتییە مرۆییەکان بۆ هاووڵاتییانی ئەو دوو وڵاتە تاوتوێ کرد.
نووسینگەی میدیایی سەرۆکوەزیرانی عێراق لە ڕاگەیەندراوێکدا بڵاویکردەوە، تێیدا هاتووە، سوودانی ئامادەیی عێراقی دووپاتکردەوە لە بەشداریکردن لەو کۆنگرەیەی کە ماکرۆن لە داهاتوودا بانگەشەی بۆ دەکات لە پاریس، هاوکات سوودانی هەنگاوی عێراقیشی بۆ بەستنی کۆنفرانسێکی هاوشێوە لە بەغدای پایتەخت پشتڕاستکردەوە.
ئاماژەی بەوەش کردووە، لە پەیوەندییە تەلەفۆنییەکەدا تاوتوێی پەیوەندییە دوو قۆڵییەکانی نێوان هەردوو وڵات کران، بەتایبەتی لە بواری ئابووری و بەهێزکردنی بوونی کۆمپانیاکانی فەرەنسا بۆ کارکردن لە عێراق.
باسی لەوەش کردووە، هاوکات باسیان لە کۆتاییهاتنی ئەرکەکەکانی هێزەکانی هاوپەیمانانیش کرد لە عێراق، سەرۆکی فەرەنسا پابەندبوونی وڵاتەکەی بە وادەی دیاریکراو و گواستنەوەی هێزەکانی وڵاتەکەی بۆ فەرەنسا دووپاتکردەوە