هەرێم نیوز

ئاگاداری بنەماڵەی شەهیدان و ئەنفالکراوان لە هەولێر دەکرێتەوە کە بەزووترین کات سەردانی بەڕێوەبەرایەتی گشتیی شەهیدان و ئەنفالکراوانی هەولێر بکەن، بەپێچەوانەوە مووچەکانیان رادەگیرێت.

بەڕێوەبەرایەتی گشتیی شەهیدان و ئەنفالكراوانی هەولێر رایگەیاند، ‎ئاگاداری بنەماڵەی سەربەرزی شەهیدان و ئەنفالکراوانی سنووری هەولێر دەکەینەوە، ئەوانەی وارسی شەهیدن و بایۆمەتریان نەکردووە، یاخود کۆدی بایۆمەتریان نەهێناوە، پێویستە لە رێكەوتی 11/8/2024 کە دەکاتە ڕۆژی یەکشەممە و ڕۆژانی دواتر، سەردانیان بكەن.

ئاماژە بەوەش کراوە، پێویستە لەو ماوەیەدا سەردانی بەڕێوەبەرایەتییەکە بكەن، كە دەكەوێتە گەڕەکی (ئازادی)، مەبەستی کاری پێویست، بۆ ئەنجامدان و وەرگرتنی کۆدی بایۆمەتری".

لە راگەیەندراوەکەدا هاتووە "لەكاتی سەردانەكەدا، پێویستە سەرجەم وارسانی شەهید و ئەنفالكراوان ناسنامەی شەهیدان و کارتی نیشتمانییان پێ بێت".

بەڕێوەبەراتییەکە دەڵێت، پرۆسەکە 60 رۆژ بەردەوام دەبێت، بەپێچەوانەوە ئەو وارسانەی بایۆمەترییان ئەنجام نەداوە، مووچەکانیان رادەگیرێت.