هەرێم نیوز
ئەنجومەنی وەزیرانی هەرێمی کوردستان ڕایگەیاند، لیستی مووچەی ھێزی پێشمەرگە رەوانەی حکومەتی فیدراڵ کراوە و تا ئێستا عێراق مووچەی مانگی ٥ و٦ ی خەرج نەکردوە.
ئەنجومەنی وەزیرانی ھەرێم راگەیەنراوێکی بڵاوکردەوە ئاماژەی بۆ ئەوەشکرد، گفتوگۆکان لەگەڵ حکومەتی فیدراڵی درێژە پێدەدەن، خوازیاری چارەسەری ڕاستەقینەی سەرجەم بابەتە ھەڵپەسێردراوەکانی نێوان ھەردوو حکومەتی ھەرێم و حکومەتی فیدڕاڵن.
ئەنجومەنی وەزیران ڕاشیگەیاند، دامەزراوەکانی ھەرێم پابەندییەکانی خۆیان بەجێگەیاندووە و ئەرکی حکومەتی فیدڕاڵیشە کە شایستەکانی ھەرێمی کوردستان خەرج بکات.
هاوکات ئەنجومەنی وەزیران داوا لە عێراق دەکات، شایستەکانی دیکەی ھەرێم لە تەرخانکراوەکانی تەشغیلیی و پڕۆژەکانی ئاوەدانکردنەوە و وەبەرھێنان خەرج بکات.
جەختیشیکردەوە، ھەرێم بەشی گەنجینەی فیدڕاڵیی لە داھاتە نانەوتییەکانی ھەرێمی بە کاش بۆ وەزارەتی دارایی فیدڕاڵ ناردووە، مانگانەش لیستی مووچەی مووچەخۆران و تەرازوویی پێداچوونەوەی مانگانەی بە شێوەیەکی شەفاف ئاراستەی وەزارەتی دارایی فیدڕاڵ کراوە.