هەرێم نیوز
عەتوان عەتوانی، سەرۆکی لیژنەی دارایی لە پەرلەمانی عێراق ڕایگەیاند، مووچە لە بودجەی ساڵی 2024ـدا جێگیرکراوە.
سەرۆكی لیژنەی دارایی پەرلەمانی عێراق دڵنیایی دەداتە فەرمانبەران لەبارەی پارەی مووچە و دەڵێت، هیچ كێشەیەكی دارایی لە عێراقدا بوونی نییە.
عەتوان عەتوانی بە میدیا عێراقییەکانی ڕاگەیاند، خشتەكانی بودجەی 2024 تەواوبوون و بەمزووانە دەگەنە پەرلەمان بۆ گفتوگۆ و پەسەند كردنیان.
وتیشی، لە بودجەی ئەمساڵدا هیچ كێشەیەك بۆ مووچە نابێت و تەواوی مووچەی فەرمانبەران و خانەنشینان و تۆڕی پاراستنی كۆمەڵایەتی زامن كراوە.
ئەوەش لە کاتێکدایە، رۆژی 13ی ئازاری ساڵی رابردوو پڕۆژەیاسای بودجەی ساڵەکانی 2023-2025 لە ئەنجومەنی وەزیران پەسەند کرا و نێردرایە پەرلەمانی عێراق هاوکات بە گەورەترین بودجەی عێراق دادەندرێت لە مێژوودا و بە تێکڕاش خەرجی مووچە 20 ترلیۆن دینار زیادیکردووە.