هەرێم نیوز
بەبڕیاری لیژنەی فەتوا لە سنووری پارێزگای سلێمانی، گۆڕانكاری لەكاتی بانگەکاندا دەكرێت و گۆڕانكارییەكانیش زۆرتر لە كاتی بانگی بەیانی و عەسردایە؛ گۆڕانکاریی بانگی ئێوارەش نزیکەی 5 خولەکە.
د. محەممەد عەبدوڵڵا، سەرۆكی لیژنەی پێداچوونەوە بە خشتەی كاتی بانگەكان لە سنووری سلێمانی راگەیاند، بەشێوەیەكی "زانستی و شەرعی" ئەو گۆڕانكارییانەیان كردووە و گوتی: "نزیكەی 30 ساڵە ئەو خشتەی بانگدانە هەیە و هیچ گۆڕانكارییەكی بەسەردا نەهاتووە، هەندێك لە مامۆستایان بەتایبەت لە رەمەزانی رابردوودا رەخنە ئەوەیان هەبوو كە زووتر بانگ دەدرێت. دوای پێداچوونەوە بۆمان دەركەوت قسەكەیان راستە، بۆیە ئەو گۆڕانكارییانەمان كرد."
لەبارەی گۆڕانكارییەكان و ئەو كاتانەی گۆڕانكاری بەسەردا هاتووە. د. محەممەد ئاماژەی بەوەکرد، "گۆڕانكارییەكان بەپێی مانگەكان جیاوازە، بەڵام بەشێوەیەكی گشتی كاتی بانگدانی بەیانی و عەسر زۆر گۆڕاوە، بەیانی نزیكەی حەوت خولەك و عەسریش نزیكەی 15 خولەك درەنگتر بانگ دەدرێت، بۆ نوێژی نیوەڕۆ، ئێوارە و خەوتنانیش نزیكەی پێنج خولەك درەنگتر بانگ دەدرێت."
سەرۆكی لیژنەی پێداچوونەوە بەخشتەی كاتی بانگەكان لە سنووری سلێمانی داوا لە خەڵك دەكات لەپێناو ئەوەی تووشی گرفت نەبن بەرنامەی كاتی بانگدانی مۆبایلەكانیان ئەبدەیت بكەنەوە.
د. محەممەد گوتی، "گۆڕانكاری لە كاتی بانگدان دەبووایە لە سەرجەم ناوچەکانی كوردستاندا بكرایە، ئێمە لە سلێمانی زووتر ئەو كارەمان كرد، بەڵام لە هەولێر و دهۆك فریانەكەوتن، بۆیە بڕیارە دوای رەمەزان لە دوو شارەش گۆڕانكارییەكانی كاتی بانگدان بكرێن."