ئەگەر ئۆپۆزیسیۆن و بزوتنەوەی ناڕەزایەتی و شەقامی ناڕازی بوونی سەربەخۆی هەیەو بە ئەرکەکانی هوشیارە، خوێندنەوەیەکی واقیعی و زانستی وهاوسەنگی بۆ واقیع و هەل و مەرجە مێژووییەکە هەیە، سوود لە ئەزموونی پێش خۆی وەردەگرێت و خاوەنی ئەجێندایەکی نیشتیمانی بەرچاو ڕوونی گۆڕانکاری و دووبارە بیناکردنەوەی سیستمە،
نابێت پێی وا بێت بە کەرەسەی کۆن بینای نوێ دروست دەکرێت. یاخود لەسایەی هەمان ئەو هەل و مەرجەی شکستی تا ئێستای بەرهەم هێناوە، دەتوانرێت گۆڕانکاری بکرێت، چونکە کوردستان ژێرخانێکی سیاسی و دیموکراتی لاوازی هەیە، بەدەست لاوازی کوشندەی لاوازیی و ناکارایی دام و دەزگاکان و دابەشبوونەوە دەناڵێنێت. ئەوەش دەخوازێت، ئۆپۆزیسیۆنی ئێستا بە هوشیارییەوە بجوڵێتەوەو قوڵ لە ئەرکەکانی ڕامێنێ و لە هەڵبژاردنیشدا کار بخاتە سەر ژێرخان، نەك سەرخان.
هەربۆیە، ئەرکی ئەو نیە بەشداری لە داڕووخاندنی پاشماوەکانی هێز لە هەرێمدا بکات، چونکە ئەوە تەواوکەری ناکۆکی عەبەسیانەی دوو حیزبە حوکمڕانەکەیە لەسەر حسابی قەوارەی هەرێمی کوردستان. لەم چوارچێوەشدا بانگەواز لە ئۆپۆزیسیۆن و بزوتنەوەی ناڕەزایەتی کۆمەڵایەتی هەرێم دەکەم، دەستەی نیشتیمانی ڕزگارکردنی قەوارەی هەرێم ( یان هەرناوێکی تر) پێکبهێنن، نەخشە ڕێگایەك دابنێن بۆ فشارێکی نێوخۆیی و دەرەکی لەپێناو:
١- یەکپێگرتنەوەو دووبارە بیناکردنەوەی هێزی پێشمەرگە وهێزەکانی ئاسایشی ناوخۆو دەزگا هەواڵگرییەکان. لەم پێناوەشدا نەخشەی خۆپیشاندانی سەراسەری، فشاری دەرەکی و جۆرەها شێوازی تر بگرینەبەر بۆئەوەی ئەم پرسە چیتر بۆ ئیرادەی نیمچە سڕبووی بڕیاربەدەستانی ئێستای پارتی و یەکێتی بەجێنەهێڵرێت.
٢- ڕێکەوتن و پەسەندکردنی دەستورێك بۆ هەرێم، ئەم خاڵەیان بۆ ئێستا دوشم و بۆ هەڵبژاردن ئەگەر کرا ئامانج و بۆ دواتر بەرنامەی کاری کردەیی بێت، چونکە لەسایەی بوونی هێزەکانی حەفتاو هەشتا و دەزگای ئاسایش بەم جۆرەی ئێستاو دابەشبوونەکان و زۆنە حیزبییەکان و کۆمەڵگەی پێناسەنەکراوی سیاسی و نەبوونی دەستوور، هەڵبژاردن نەك هەر نابێتە چارەسەر بەڵکو ئەگەری زۆرە نائومێدییەکان قوڵتر و داڕووخاوییەکان زۆرتر و مەترسیدارتر بکات.