بۆ جاری پێنجەم لە مانگێکدا ، دیسانەوە" دۆناڵد ترەمپ " باسی ئەو چەکانەی کرد کە داویەتی بە کورد ، وەک ئەوەی ئەم گەلە هێشتا لە قوڵایی فایلەکانی ڕۆژهەڵاتی ناوەڕاستدا ئامادەبێت، و لە یادەوەری شەڕ و هاوپەیمانی و نەخشەکاندا کە دەیان ساڵە ئامادەییان هەیە، کاڵ نەبوونەتەوە. وا دیارە هەرکاتێک فایلەکانی چەک و هێزو و ململانێ لەسەر ئایندەی ڕۆژهەڵاتی ناوەڕاست بکرێتەوە، هەمیشە ناوی کورد دەگەڕێتەوە!!
ڕەنگە هەندێک پێیان وابێت کە لێدوانەکانی ترامپ لە پەیامی سیاسی زیاتر نییە کە ئاراستەی ئێران یان نەیارەکانی لەناو ئەمریکادا دەکرێت و ڕەنگە بەشێک لە حیساباتی ئاسایی هەڵبژاردنەکانی هەڵبگرن، بەڵام خوێندنەوەیەکی قووڵتر شتێکی زۆر لەوە گەورەتر ئاشکرا دەکات: کورد هێشتا لە عەقڵی سیاسی ئەمریکادا ئامادەیە، تەنانەت دوای گۆڕینی ئیدارە و ڕووخسار و سیاسەتەکانیش!!
ئەمریکا بەهۆی ئەزموونی درێژخایەنی لە ڕۆژهەڵاتی ناوەڕاستدا، زۆر باسی ئەو لایەنانە ناکات کە کاریگەرییان لەدەستداوە، بەڵکو بەرژەوەندی خۆی بۆ ئەو لایەنانە دەپارێزێت کە بە ڕۆڵی بەردەوامی دەزانێت لە هاوسەنگیەکانی ناوچەکەدا. لێرەوە دەتوانین لەوە تێبگەین کە بۆچی ناوی کورد لە لێدوانەکانی ترامپ و سیاسەتمەدارانی دیکەی ئەمریکادا چەندین جار دەگەڕێتەوە. کورد لای واشنتۆن تەنیا وردەکارییەکی بچووک نییە لە ململانێکانی ڕۆژهەڵاتی ناوەڕاستدا، بەڵکو دەکرێت لە ئاڵۆزترین و مەترسیدارترین ساتەکاندا، لە ڕووی سیاسی و سەربازییەوە خۆی بسەپێنێت!!
کورد بۆ مانەوەی خۆی ، شەڕی سەختی کردووە، و چەندین جار خۆی لە دڵی ئەو شەڕانەدا بینیوە کە ناوچەکەیان لە قاڵب داوە. کورد لە ڕووبەڕووبوونەوەی ڕژێمە ستەمکارەکانەوە تا شەڕی تیرۆر، لە پاراستنی شارەکانەوە تا بەرگریکردن لە هەزاران هاوڵاتی مەدەنی، سەلماندوویەتی کە ئەوان تەنیا گرووپێک نین کە بەدوای دانپێداناندا دەگەڕێن، بەڵکو هێزێکی ڕاستەقینەیە لەسەر زەوی. بۆیە کاتێک واشنتۆن باس لە ڕۆژهەڵاتی ناوەڕاست دەکات، کورد لە یادەوەری سیاسی و سەربازی ئەمریکادا جێگەیەکی دیاریکراوی هەیە!!
ڕەنگە ئەوەی زۆر جێی سەرنجە ئەوەیە کە تەواوی وڵاتانێک هەن کە سوپا و باڵیۆزخانە و کورسییان لە نەتەوە یەکگرتووەکاندا هەیە، لەگەڵ ئەوەشدا وەک کورد لە گفتوگۆ نێودەوڵەتییەکان ئامادە نین. لە کاتێکدا ئەم گەلە کە هێشتا لە نێوان چوار وڵاتدا دابەش بووە و هێشتا پرسەکەی لە نێوان سنوورەکان و بەرژەوەندییە نێودەوڵەتییەکاندا هەڵپەسێردراوە، ناویان لە ناوەندەکانی بڕیاردان و لە لێدوانی سەرۆکەکان و لە حیساباتی زلهێزەکاندا٫ بەردەوام ئامادەییان هەیە!
واشنتۆن، چەندین ساڵ لەمەوبەر درکی بەوە کرد کە کورد خاوەنی شتێکی گرنگە لە هاوکێشەکانی ناوچەکەدا، ئەویش توانای بەرگەگرتنە. هەر جارێک بەر نائومێدی، گەمارۆ، یان شەڕ دەکەوتن، جارێکی تر دەگەڕانەوە بۆ مەیدانەکە. ڕەنگە هەر لەبەر ئەم هۆکارە بە ئاسانی یادەوەری کۆشکی سپی بەجێ نەهێڵن، چونکە سیاسەتی ئەمریکا هەرچەندە سارد و پراگماتیک دەرکەوێت، ڕێز لەو هێزانە دەگرێت کە سەرەڕای هەلومەرجی مەحاڵ٫ توانیویانە بوونی خۆیان بسەپێنن!!
بەڵام پەیوەندی نێوان کورد و واشنتۆن٫ هەمیشە سەقامگیر و دادپەروەرانە نەبووە. مێژوو چرکەساتگەلێکی پڕ لە ئازاری تێدایە کە کورد هەستی بەوە کردبوو کە دوای تەواوبوونی پێویستی پێیان بەتەنها ماونەتەوە. بەرژەوەندییەکانی ئەمەریکا زیاتر لە جارێک گۆڕاوە، هاوپەیمانییەکان گۆران و کورد هەندێک جار بەبێ پاراستنی ڕاستەقینە ڕووبەڕووی چارەنووسی خۆی بۆتەوە. بەڵام دۆزی کورد ون نەبوو ، کورد نەیکردە لاپەڕەیەکی لەبیرکراو لە ئەرشیفی سیاسەتی نێودەوڵەتیدا.
ڕەنگە هێزی ڕاستەقینەی کورد هەر لەم خاڵەدا بێت: کە سەرەڕای هەموو نائومێدییەکان، هەر مانەوە. گەلانێکی زۆر لە دوای شکستی گەوورە ڕووخاون، و دوای چەندین ساڵ لە چەوساندنەوە و ئاوارەبوون لە گۆڕەپانەکەدا دیارنەماون، بەڵام کورد لە هەموو قۆناغێکدا توانای بەرهەمهێنانەوەی بوونی سیاسی و سەربازی و میدیایی خۆی، مایەوە!!
ڕاستە کورد هەڵەی زۆری کرد، بەهۆی دووبەرەکی ناوخۆیی و ململانێی حزبی لاواز بوو، ڕەنگە دەرفەتی مێژووییشی لەدەستدابێت کە دەکرا بەتەواوی ڕێڕەوی دۆزی خۆی بگۆڕێت، بەڵام ڕاستییەکەی حاشا هەڵنەگر ئەوەیە کە ئەم گەلە هێشتا خاوەنی توانایەکی دەگمەنە بۆ مانەوە. تەنانەت نەیارانی کوردیش درک بەوە دەکەن کە ئەم بابەتە بە ئاسانی نامرێت و پشتگوێخستنی کورد، بە مانای کۆتایی هاتنیان نییە!!
لێدوانەکانی تڕەمپ لە بارەی کوردەوە. ڕەنگدانەوەی واقیعێکی سیاسی ڕوونە: کورد هێشتا بەشێکە لە هاوسەنگی ڕۆژهەڵاتی ناوەڕاست و زلهێزەکانیش هێشتا وەک ژمارەیەک دەیانبینن کە ناتوانرێت لە هاوکێشەکانی ناوچەکەدا وەلاببرێن. کاتێک سەرۆکی ئەمریکا دەگەڕێتەوە بۆ ئەوەی دووبارە و سێبارە باسیان بکات، ئەمە مانای ئەوەیە کە بوونیان چیتر تەنها ڕووداوێکی کاتی نییە کە پەیوەستە بە شەڕێکی تێپەڕبووەوە، بەڵکو بووەتە بەشێک لە خودی یادەوەری سیاسی ئەمریکا.