بە یەکێک لەپێناسەکان، سیاسەت هونەری لێکگەیشتن نییە بەقەد ئەوەی بواری رێکخستنەوەو ئیدارەدانی لێکنەگەیشتنە، واتا هونەری بەدامەزراوەییکردنی ململانێ و ناکۆکیە، مادام مرۆڤ بونەوەرێکی قسەکەرە کەواتە فەزای سیاسی بەجۆرێک لەجۆرەکان فەزای هاتوهاوار و دەنگە دەنگ و ترازانە، سیاسەت ئەو ساتەوەختەیە کە مانایەکی شیاو بۆ ئەو فەزایە بەرهەمئەهێنێ و بەسیستمی ئەکات، یان مانایەکی تازە ئەدا بەهاتوهاوار و ئەبیەستێتەوە بە پڕۆژەیەکی دیاریکراو، مادام سەردەمی سیاسەت سەردەمی ناوبردنی کۆمەڵگایە بە (مەیدانی ناکۆکی)، هەوڵدان بۆ سڕینەوە یان رەتکردنەوەی یەکجارەکی ململانێ و جیاوازیەکان نەک مومکین نییە، بگرە رامان ئەکێشێتە مەیدانی قۆڵبادان و پەراوێز خستن و سەرەنجام بەریەکەوتن، چونکە سازانی زۆرەملێ بەهیچ شێوەیەک یەکسان نییە بە سیاسەت، بەڵکو ئیدارەی ناکۆکی و بەستنەوەی بە پڕۆژەیەکی سیاسی و سەرەنجام کۆمەڵایەتی جەوهەری سیاسەت و سیاسەتکردنە، یەکێک لەو کەسانەی ئێستا لەکوردستان ئەتوانێ بەو مانایە سیاسەت بکات سەرۆکی هەرێم نێچیرڤان بازانییە.
لەم قۆناغەدا کە تارمایی ململانێ و دابەشبون دیمەنی سیاسی بەتەواوی داپۆشیوە، داگیرسانی دەیان قەیران لەچارەسەری تاکە قەیرانێک ئاسانترە، متمانەی نێوان هێزو لایەنە سیاسیەکان و دەسەڵات و کۆمەڵگا چۆتە ئاستێکی مەترسیدار، لەساتی ئاوادا سەرکردایەتیکردن تەنیا لە پۆستێکی سیاسیدا کورت ناکرێتەوە، بەڵکو ئەبێ بە تاقیکردنەوەیەکی مێژوی و ئەخلاقی. بۆیە ئێمە لەم کاتەدا کەزەمەنی یەکتربڕی قەیرانی جۆراوجۆری سیاسی، کۆمەڵایەتی و حزبی و ئابوریە، پێویستمان تەنیا بە سەرۆکی هەرێم نییە بە مانا ئیداریەکەی، بەڵکو پێویستمان بە ستایلێک لە سەرکردایەتی هەیە كە هێزی بەرهەمهێنانی سازان و چارەسەری قەیرانەکانی لەبەردەست بێت، تاقیکردنەوەی چەند ساڵەی نێچیرڤان بارزانی پێمان ئەڵێ شایستەیی ئەوەی هەیە تولەرێی داخران بگۆڕێ بەشارێگای کرانەوە، ئەم پرۆسەیە هێندەی مەشقی کوردایەتیە لە روبەری فراوان و لەجۆری ئۆرجیناڵ، قەتیسکردنی نییە لە دەهلیزی بەرژەوەندی حزب و گروپەکان.
ئەو واقیعەی ئێمە تیایا ئەژین لەهەمو کات زیاتر پڕە لە هاتوهاوار و ناکۆکی و ململانێ، پڕە لەروداو پێشهاتی سیاسی و ململانێی مەیدانی لەشێوەی جەنگ کە لێکەوتەی بەرچاویان لەسەر دوبارە نەخشاندنەوەی داهاتوو هەیە، بۆیە لەهەمو کات زیاتر ئێمە پێویستمان بەو تەکنیکە هەیە کە ئەو لێکنەگەیشتن و پێکنەگەیشتنە بخاتە فۆرمێکی دامەزراوەیی کە لەدواشت بتوانین ناوی بنێین سیاسەت.
رەنگە زیادەڕەوی نەبێ گەر بڵێین روداوەکانی رۆژاڤا ئەو هاوکێشەیەی زیاتر رونکردەوە لەمیانەی ئەو پرسیارەی چۆن مەترسی و هەڕەشەکان لەچەند کایەی تری وەکو هەڵچون و پشتیوانی میللی سەرانسەری و دیپلۆماسی کرایە جۆرێک لە پارسەنگ بۆ دۆخی رۆژئاوا، یان راستر بڵێم بوە مایە لەدایکبونی جۆرێکی تری کارکردن، واتا سیاسەتی راستودروستیی کوردایەتی ئێستا ژێرخانێکی تازەی بۆ دروستبو کە ژێرخانی پشتیوانی میللی سەرانسەری و دوبارە دەمە زەردبونەوەی پشتیوانی دەرەکی بو، کە رونە سەرۆکی هەرێم لەو روەوە رۆڵێکی میحوەری بینی و شوێندەستی دیاربو، بەتایبەت لە کاتی دراماتیکی فەرزکردنی رێکەوتنێک کەهی کاتی شکست و کەوتن بو، واتا لەفۆرمدا رێکەوتن بو، بەڵام لەناوەرۆکدا تەسلیمبون، بگۆڕیت بەدانوستان، بەرای من نێچیرڤان بارزانی لەو پێگەی خۆیەوە ئەکرێ نمایندەی ئەو ژێرخانە بکات و لە کاری سیاسی ستراتیژی و رۆژانەش بەرجەستەی بکات.
بەگوێرەی ئەزمونی نێچیرڤان بارزانی لە پێکهێنانی کابینەی یەکگرتوەوە سیاسەت بریتی نەبوە لە پەراوێزخستن یان رەتکردنەوەی ناکۆکی، بەڵکو فۆرمێک بوە بۆ بەیەکەوە هەڵکردنی ناکۆکی و بەیەکەوە رێکردن لەگەڵ جیاوازیەکان، لەکاتی دەستپێکی کارەکەی وەکو سەرۆکی کابینەی یەکگرتو لەیادی دامەزراندنی (ی ن ک) بەرونی وتی یەکێتی وەکو پێویستیەکی مێژوی خەباتی خەڵکی کوردستان لەدایکبوە، کە ئەمە قەڵپکردنەوەی تێڕوانینێکی کۆنی پەیوەندی نێوان یەکێتی و پارتی بو، ناردنی پەیامێک بو بۆ دەسپێکی کاری پێکەوەیی، بەڵام ئەو لەبۆنەیەکی تەواو یەکێتیانە ئەو رستە مێژویەی درکاند، چونکە ویستی وابو ژێرخانی دوبەرەکی بگۆڕێ بۆ ژێرخانی سازان و کاری بەیەکەوەیی، واتا هێمابو بۆ تێڕوانینی خۆی وەکو سەرۆکی حکومەت، دوای ئەوە دەرگا بەسەر جۆرە لێکگەیشتنێکی تازەدا کرایەوە کە تا ئەندازەیەک رەنگدانەوەی بەسەر ژیانی سیاسی و کۆمەڵایەتیدا هەبو، یان لانیکەم بەشێک لەلێکەوتەکانی شەڕی ناوخۆی سریەوە، بەڵام دواتر نەگەیشتە ئەو قۆناغەی بەیەکجاری کۆتایی بە دو ئیدارەیی یان دوجوگرافیای سەوزو زەرد بێت، من لێرەەوە جەخت لەسەر دەرەنجامەکان ناکەمەوە بەڵکو باس لەشێواز و تەکنیکی سیاسی ئەکەم، کە هەوڵیدا ئەو دۆخە تێپەڕێنێ و قۆناغی باشیشی بڕی.
رەنگە هەندێ جار ڕوانین لەپەنجەرەی ئەزمونی تاکەکەسی رێگایەکی دیکە بێ بۆ تێگەیشتن لەرۆڵی سیاسی و حوکمڕانی هەندێ کەس، من لەوانەبوم لەکابینەی پێنجەوە تا حەوت لە سەرۆکایەتی حکومەتی هەرێمی کوردستان کارمکردوە، ئێستاش لەسەرۆکایەتی هەرێم کار ئەکەم، ئەزمونی کارکردن لەو شوێنەی ئەو تێیدا سەرۆکە تائەندازەیەک تایبەتە، کە لەدەرگای ئەو دامەزراوەیە دێیتە ژورەوە زۆرێک لەو ئینتیما سیاسی یان حزبیەی هەڵتگرتوە بەویستی خۆت دای ئەنێیت یان فەزاکە وات لێ ئەکات فەرامۆشی بکەیت و بچیتە ناو فەزای ئینتیمایەکی ترەوە کە گەورەتر لەئینتیمای حزبی، جۆرێک لەبەپرسیارێتی تازەت بۆ دروست ئەبێ کە تۆزێک باڵاتر لە سەقفی حزبی یان ناوچەیی مامەڵە بکەیت، ئەو چەند ساڵەی دوایی پەیوەندی نێوان لایەنە سیاسیەکان گرژی و ئاڵۆزی زۆری تێکەوت و بەسەر دامەزراوەکانی حوکمڕانی کورستانیشەوە دەرکەوت، هەتا لەکەشوهەوای توندو بەریەکەوتنی هەڵبژاردنەکانیش ئەوەی پەیوەندی بە خودی نێچیرڤان بارزانی و ستافەکەیەوە هەبو، لانیکەم ئەوەی لەمنەوە دیاربو، نەک نەگەیشتە روبەڕوبونەوە، بگرە رایەڵەکانی پەیوەندی و ئیشکردن وەکو خۆیان بون، بیرمە ئەوکات تیمی یەکێتی لەژێر دو فشاری سەختدابو، فشاری پارتی وەکو هێزی هاوپەیمان - ناکۆک لەیەک کاتدا، هەروا فشاری داخوازی خەڵکی یەکێتی، لەو کاتەدا نێچیرڤان بازرانی زۆرترین دەسەڵاتی خۆی گواستەوە بۆ عیماد ئەحمەد جێگری سەرۆکی حکومەت، بەڵام ئەویش بە بەرپرسیارێتیەکی زۆرەوە دەسەڵاتەکانی پیادەکردو ئاوەکەی کردەوە جۆگەلەی حکومەت، ئەوەندەی من بزانم لەچەند ويستگەیەکی هەستیاریشدا گەر دیدو بۆچونی نێچیرڤان بارزانی لە لایەن یەکێتیەوە لەبەرچاو بگیرابوا، لانیکەم بەشێک لە قەیرانەکانی ئەوساو ئێستای یەکێتی رویان نەئەدا یان بەجۆرێکی دیکە ئەکەوتنەوە، چونکە سیاسەتمەدارێکە پێی وایە هەمیشە حەقیقەت لەنیوەی رێگایە، کە هەوادارانی مەدرەسەی راستەقینەی مام جەلال حەنینێکیان بۆ ئەو میانڕەویە هەیە.
هیچ مەبەستێکی بەراوردکارانەم نییە لەهێنانەوەی ئەو نمونەیە، بەڵکو ئەمەوێ پەنجە بخەمە سەر جومگەیەکی دوانەیی هاوپەیمانی- دوبەرەکی حوکمڕانی کوردستان کە تیایدا نێچیرڤان بارزانی سەرۆکی حکومەت بو و بەسەرکەوتوی تێیپەڕاند، خاڵێکی تری گرنگی ئەزمونی کارکردنی نێچیرڤان بارزانی لەبواری حوکمڕانی کارکردن بو لەژێر رێنوێنی مام جەلال و کاک مەسعود، سەرەڕای پێگەی بەهێزی حزبی خۆی، هەماهەنگی و پەیوەندی راستەوخۆی لەگەڵ مام جەلال هەبو کە گەرەنتی چارەسەری زۆر ئاستەنگ و لابردنی کۆسپ و تەگەرە بو.
بەتێگەیشتنی من ئەرکی سەرۆکایەتی لای نێچیرڤان بارزانی بریتی نییە لەبردنەوەو تۆمارکردنی سەرکەوتن لەجەنگی سیاسیدا، بەڵکو کارکردنە بۆ ئەوەی چیتر پێویستمان بەو جەنگە نەبێت، لەکۆتایشدا هێزو هەیبەتی سەرۆکەکان بەو وتارو دروشمە ئاگرینانە نین لەبەردەم بڵندگۆکان، بەڵکو بەژمارەی ئەو قەیرانانەن کە ئەتوانن رێگریان لێ بکەن لەوەی روبدەن، پیشەسازی قەیران و هاتوهاوار کەرەستەی نیشتیمانسازی نیین، بەبڕوای من مەترسی کوردستان ئێستا دابەشبون و پەرتەوازەیی نییە، بەقەد ئەوەی ئاسایی بون و نۆرمەلایزبونی دابەشبونە، واتا دابەشبون ببێ بە حالەتێکی سروشتی و خۆرسک و قبوڵکراو.