هەروەكوو پێشتریش باسمان كرد، ناوچەكە بەرەو گۆڕانێكی ریشەیی هەنگاو دەنێت، تەنانەت گۆڕینی نەخشەی ناوچەكە باسوخواسێكی گەرم و جیدییە. ئەم رووداوەی لە حەلەبیش هاتووەتە ئاراوە، كە چەكدارانی تەحریر شام، خەریكە تەواوی حەلەب كۆنتڕۆڵ بكەن، ئەم هەنگاو و پێشهاتە لەناكەوەش بەشێكە لەو پڕۆژەیەی ناوچەكە پێیبدا تێپەر دەبێت.

تەحریر شام بەلای توركیاوە تیرۆرستە، واتە لەناو پەرلەمانی توركیا بڕیاری تیرۆرستبوونی ئەو گروپە دەرچووە، بەڵام ئاشكرایە كە توركیا لەڕووی لۆجیستی و سەبازییەوە پاڵپشتی لەو گروپە دەكات و تەنانەت توركیا رۆڵی گەورەی هەبوو، كە ئیدلیب نەكەوێت و توانی رووسیا بڕوا پێبهێنێت كە دەستبەرداری ئیدلیب ببێت. (ئیدلیب ئەو شارە گەورەیەیە، كە بەتەواوی لەدەستی تەحریر شامدایە و بەێڕوەی دەبات).

هەروەكوو ئەوەی دەزانن، عەزاز، ئەلباب و جەرابلووس و عەفرین لەدەستی توركیایە، واتە توركیا داگیری كردووە، بۆیە لەوێوە توركیا چەكدارانی تەحریر شام دەگوازێتەوە بۆ حەلەب، تا بتوانن ئەو شارە بەتەواوی كۆنتڕۆڵ بكەن، ئەمەش چەند میدیایەكی توركی باسی دەكات.

میتی توركیا، رۆڵی سەرەكی لەو ئۆپەڕاسیسۆنەدا هەیە، دەیەوێت ئەو هێڵەی گرنگە بۆ رژێمی سووریا لەڕووی وشكانییەوە بشكێنێت، هەروەها رۆڵی ئێرانیش لەوێ لاواز بكات، روونیشە رژێمی ئەسەد ئەو توانایەی نییە شەڕی گروپە چەكدارە توندڕەوەكان بكات.
توركیا دەیەوێت ئەو ئامانجەی هەیبوو لە ٢٠١٩، ئەویش رێگەی وشكانی M5 و M4 لە حەلەب بخاتە ژێر ركێفی خۆیەوە، ئەمەشی بە پلانێك لەگەڵ تەحریر شامدا كردووە، ئەگەر ئەم پلانەش سەربگرێت و حەلەبیش بكەوێت، ئەوكات لەڕەگەوە رژێمی ئەسەد گۆڕانی بەسەردا دێت شەڕیش فراوان دەبێت.

ئامانج نەمانی رۆژئاوایە

ئەگەر حەلەب بكەوێتە دەستی تەحریر شام، ئەگەر بەهێزە كە شەهبە و تەلرفعەت گەمارۆ بدرێت، كە ئێستا ئەو دوو ناوچەیە لەدەستی یەپەگەدایە، ئەمەش راستەوخۆ هەڕەشەیە بۆ سەر كورد و رۆژئاوا و كارەساتی بەدوا دێت، چونكە دوای ئەوەی توركیا عەفرینی داگیر كرد، هەزاران ئاوارەی كوردی عەفرین روویان لە شەهبە و تەلڕفعەت كردبوو و لەوێ گیرساونەتەوە، ئەگەر شەڕ بكەوێتە ئەوێ، چاوەڕوان دەكرێت هەزاران ئاوارەی تر روو لە توركیا و هەرێمی كوردستان بكەن.

ئەگەر سەیری لێدوانەكانی ئەردۆغان بكەیت لە پێشووتردا، بەردەوام گوتویەتی تەلڕفعەت بۆ توركیا گرنگە و دەبێت لەدەستی تیرۆرستان دەربهێنرێت (مەبەستی یەپەگەیە)، بۆیە دوور نییە ئەم شەڕەی هەڵگیرساوە، تەلڕفعەت و شەهبە بەشێك بن لەو پلانە و ئەوێش بكەوێت.

ئامەد دیجلە، كە پێشتر پەرلەمانتار بووە لە توركیا، پێیوایە توركیا و رووسیا رێككەوتوون كە رووسیا لە تەلڕفعەت بكشێتەوە و رێگە بۆ توركیا خۆش بكات تا پەلاماری بدات، ئەگەر ئەوە روو بدات، بەو واتایە دێت كە رۆژئاوا دەكەوێتە ناو شەڕێكی گەورەوە.
بەڵام ئەوەی مایەی دڵخۆشییە، گروپی تەحریر شام، كە بەئۆپۆزسیۆنی سووریا ناویان دەهێنرێت، لەلای ئەمریكا و رۆژئاوا تیرۆرستە و بەهەموو شێوەیەك رەتی دەكەنەوە، بۆیە ئەگەر توركیا لەرێگەی ئەو گروپەوە پەلاماری رۆژئاوا بدات، رەنگە رۆژئاوا و ئەمریكا پاڵپشتی لە یەپەگە بكەن و نەیەڵن رۆژئاوا بكەوێت، وەكوو چۆن كاتێك كۆبانێ لە لێواری كەوتن بوو، پێشمەرگە و رۆژئاوا و ئەمریكا پاڵپشتییان لە یەپەگە كرد و كۆبانێ نەكەوت، رەنگە سیناریۆیەكی لەو شێوەیە دووبارە ببێتەوە.

لەهەموو ئەگەرێكدا، دەبێت كورد خۆی بۆ گۆڕانكاری ئامادە بكات، چونكە كەوتنی رۆژئاوا بەواتای كەوتنی هەرچوار پارچەی كوردستان دێت.

لەم كاتەدا یەكگرتوویی كورد زۆر گرنگە، رۆڵی سەرۆك بارزانی زۆر گرنگە و پێویستە یەپەگە دان بەوەدا بنێت كە بارزانی رۆڵی هەبێت لە نەكەوتنی رۆژئاوا، وەكوو چۆن لە نەكەوتنی كۆبانێدا رۆڵی هەبوو.

دەبێت بزانین كەوتنی كەركووك، كەوتنی عەفرینی بەدوادا هات، كەوتنی رۆژئاواش كەوتنی تری كوردی بەدوادا دێت، بۆیە لەسەر هەموو كوردێكە پاڵپشتی رۆژئاوا بێت لەم ساتەدا.