ئەو باهۆزە سیاسی و سەربازییەی لەم دواییانەدا ناوچەکانی سووریا و بەتایبەت گەڕەکە کوردنشینەکانی حەلەب و ڕەققە و دێرەزوور و دواتریش ناوچە کوردییەکانی گرتەوە، زەنگێکی ئاگادارکردنەوە بوو بۆ هەموو کوردێک لە هەر شوێنێکی ئەم جیهانەدا بێت. هێرشکردنە سەر (شێخ مەقسوود و ئەشرەفییە) و تێکدانی ئارامیی ناوچە کوردنشینەکانی تر و هەروەها ڕەققە و دێرەزوور، دووبارە ئەو ڕاستییەی چەسپاندەوە کە ئازاری کورد لە هەر پارچەیەک بێت، لەرەلەرەکەی هەموو نیشتمان دەهەژێنێت.
گەورەترین دەستکەوتی ئەم ئاڵۆزییانە، دەرکەوتنی ئەو گیانە نەتەوەییە بوو کە ساڵانێکی زۆرە نەیارانی کورد هەوڵی کپکردنی دەدەن. کاتێک هاووڵاتیانی مەدەنی لە حەلەب و ڕۆژئاوا کەوتنە بەر شاڵاوی ڕاگواستن و نادادی، سنوورە دەستکردەکان هیچ مانایەکیان نەما. ئەو شەپۆلە ناڕەزایەتییەی لە هەولێر، سلێمانی و دهۆکەوە سەری هەڵدا و تێکەڵ بە هاواری پشتیوانیی ئامەد، مەهاباد و سنە بوو، سەلماندی کە "کوردایەتی" تەنها وشە نییە، بەڵکو پەیمانێکی خوێنە. ئەم یەکدەنگییە جەماوەرییە گەورەترین پەیام بوو بۆ جیهان، کە نەتەوەی کورد لە کاتی تەنگانەدا دەبێتە یەک قەڵغان و ڕێگە نادات هیچ پارچەیەکی بە تەنها ڕووبەڕووی چارەنووسێکی نادیار ببێتەوە.
لە پاڵ جووڵە ناوخۆییەکان، کوردانی دیاسپۆرا وەک پێگەیەکی دیپلۆماسیی نەتەوەیی خرۆشان. ئەوان لە پایتەختەکانی ئەورووپا و ئەمریکا، ڕێگەیان نەدا ڕاستییەکان بشێوێندرێن. چالاکییە بەردەوامەکانیان و گەیاندنی دەنگی مەزڵوومییەتی ڕۆژئاوا بە ناوەندە بڕیاربەدەستەکان، وای کرد کە کۆمەڵگەی نێودەوڵەتی نەتوانێت چاو لە ئاست ئەو پێشێلکارییانە دابخات. ئەمە نیشانیدا کە کورد لە هەرکوێ بێت، نوێنەری نەتەوەکەیەتی و دەتوانێت هاوکێشەکان بە قازانجی گەلەکەی
بگۆڕێت.
لە نێو ئەم هەموو ئاڵۆزییانەدا، ڕۆڵی سەرکردایەتیی سیاسیی کورد، بەتایبەت هەوڵە بێوچانەکانی سەرۆک مەسعود بارزانی، وەک سەنگەرێکی داکۆکیکار دەرکەوت. گوتارە نەتەوەییەکان و جموجۆڵە دیپلۆماسییەکان بۆ پاراستنی خەڵکی سڤیل و ڕێگریکردن لە کارەساتی مرۆیی، نیشانەی تێگەیشتنێکی قووڵ بوون لە هاوکێشە نێودەوڵەتییەکان. جەختکردنەوە لەسەر ئەوەی کە نابێت مرۆڤی کورد ببێتە قوربانیی ململانێی هێزەکان، بووەتە بنەمایەکی نەگۆڕ. ئەم هەوڵانە سەلماندیان کە هەبوونی "مەرجەعییەتێکی نەتەوەیی" چەندە گرنگە بۆ تێپەڕاندنی قەیرانەکان و پاراستنی
شکۆی نەتەوەیی.
ڕووداوەکانی سووریا و ڕۆژئاوا پێمان دەڵێن کە جیهان تەنها ڕێز لەو هێزە دەگرێت کە یەکگرتووە. ئەو حەقیقەتەی شارەکانی ڕۆژئاواوە دەرکەوت، ئەوەیە کە چارەنووسی ئێمە گرێدراوی یەکترە. ئەگەر کورد لە ناوخۆدا تەبا و یەکدەنگ بێت، هیچ پیلانگێڕییەک ناتوانێت ئیرادەی تێکبشکێنێت. مێژوو فێری کردین کە هێزی ئێمە لە یەکبوونماندایە، و هەرکاتێک وەک یەک جەستە هەنگاومان ناوە، سەرکەوتووین لە پاراستنی خاک و کەرامەتمان.