لەبنەڕەتدا گرفتەکانی ڕەیان کلدانی و میلیشیاکەی لە ٦ی تەموزی ٢٠١٧ەوە دەستیپێکرد. ئەوکاتەی رەیان کلدانی لە ریکۆردێکی ڤیدیۆیی دەرکەوت کە گوێچکەی کۆمەڵێک دەستگیرکراوی لەنزیک موسڵ بڕی. رەیان کلدانی لەو ڤیدیۆیە تەنها بە گوێچکە بڕین نەوەستا، بەڵکو هەندێکیانی ناچارکرد کە گوێچکەی بڕاوی جۆیان بخۆن.
بەربەریەتێک کە کلدانی و گرووپەکەی نیشانیاندا، پێش هەموو کەس ئەمریکای هێنایە سەر هێڵ و سەرەنجام وەزارەتی گەنجینەی ویلایەتە یەکگرتووەکانی ئەمریکا لە ١٨ی تەممووزی ٢٠١٩دا سزای بەسەر ڕەیان کلدانی، سکرتێری گشتیی بزووتنەوەی بابیلۆن و سەرۆکی لیوای بابیلۆن (یەکێک لە لیواکانی حەشدی شەعبی)، سەپاند.
بەگوێرەی بەیاننامەکەی (OFAC)، جگە لە گوێچکە بڕینی خەڵکی هۆکارێکی دیکەی سزاکان ئەوەیە کە کلدانی و لیواکەی هەستاون بە تاڵانکردنی ماڵی کریستیانەکان و دەستبەسەرداگرتن و فرۆشتنی زەوییە کشتوکاڵییەکان لە دەشتی نەینەوا، هەروەها ڕێگریکردن لە گەڕانەوەی ئاوارەکان.
بەگوێرەی بەیاننامەکەی ئەمریکا، سزاکان بریتیین لە بلۆککردنی سەرجەم موڵک و ماڵەکانی کلدانی کە دەکەونە ژێر دەسەڵاتی ویلایەتە یەکگرتووەکانی ئەمریکاوە. هەروەها ئەم بڕیارە مامەڵەکردنی هاووڵاتییانی ئەمریکا یان ئەو لایەنانەی کە لەناو سنووری ئەمریکادان، لەگەڵ ڕەیان کلدانی قەدەغە دەکات.
دواتر سزاکانی ئەمریکا بەجۆرێک چووە پێشەوە کە تەنانەت براکانی رەیان کلدانی و واعید قەدۆی ئامر لیوای ٣٠ گرتەوە.
تاوانەکانی کلدانی و میلیشیاکەی تەنانەت لەلایەن کلێسای کاسۆلیکی کلدانیشەوە بوونە جێگەی ناڕەزایی و سەرکۆنە.

کاردیناڵ پاتریاک لویس ساکۆ، ڕابەری کڵێسای کاسۆلیکی کلدانی، بەردەوام ڕەخنەی توندی لە ڕەیان کلدانی و بزووتنەوەی بابیلۆن گرتووە، بەتایبەت لەبارەی کۆنترۆڵکردنی نوێنەرایەتی مەسیحییەکان لە پەرلەماندا لە ڕێگەی هێزی چەکدار و سیاسییەوە، نەک ئیرادەی کریستیانەکان. ساکۆ ڕەتیدەکاتەوە کلدانی نوێنەرایەتیی ڕاستەقینەی پێکهاتە مەسیحییەکان بکات و پێیوایە ئەوەی ڕەیان و میلیشیاکەی دەیکەن، بەشدارییە لە گەندەڵی و دەستکاریکردنی پرسی کۆتای کریستیانەکان. گرژییەکە تا ئەو ئاستە ڕۆیشت لە ساڵی ٢٠٢٣دا، گەورەترین ناکۆکی لە نێوان کڵێسای کلدانی و دەسەڵاتی سیاسی لە عێراق سەریهەڵدا کاتێک کاردیناڵ ساکۆ بەغدای بەجێهێشت و بەرەو هەولێر ڕۆیشت. هۆکاری سەرەکیی ئەم کشانەوەیە بەستراوەتەوە بە فەرمانێکی سەرۆکایەتیی کۆمار کە ناسناوی فەرمی پاتریاکی هەڵوەشاندەوە، ئەمەش وەک هەوڵێک بۆ لاوازکردنی پێگەی دەستووریی کڵێسا لێکدرایەوە. کڵێسای کلدانی بزووتنەوەی بابیلۆن و سەرۆکەکەی، ڕەیان کلدانی، بە لایەنی سەرەکیی پاڵپشت و هاندەری ئەم دەستێوەردانە سیاسییە دادەنا، بەتایبەت لە هەوڵەکانیان بۆ کۆنترۆڵکردنی وەقفی کریستیانی و پێگەی پاتریاک لە عێراق.
ئەوەی ئەمڕۆ لەبارەی رەیان کلدانی و میلیشیاکەیەوە دەبیسترێت، تەنها کێشەیەکی سیاسیی ناوخۆیی هەرێمی کوردستان نییە، بەڵکو کێشەکە لەخودی هەرێمی کوردستان و تەنانەت عیراقیش گەورەترە و پەیوەندی بە پێشێلکاریی گەورەی مافی مرۆڤ و هەڕەشە بۆسەر خەڵکییەوە هەیە.