لە مێژووی بزووتنەوە ڕزگاریخوازییەکانی گەلاندا، کەم هێز و لایەن هەبوون کە هێندەی پژاک و ئایدۆلۆژیا هاوردەکراوەکەی، دژبەیەک و تەمومژاوی بن. پژاک کە ساڵانێکە لەژێر پەردەی ئازادی و دیموکراسی دا گەنجانی ڕۆژهەڵاتی کوردستان بۆ شاخەکان ڕادەکێشێت، لە دواجاردا و لە کۆنگرەی بەناو ئازادی ئێران دا، پەردەی لەسەر ڕووی ڕاستەقینەی خۆی لادا و سەلماندی کە دۆزی نەتەوەیی کورد لای ئەوان، نەک هەر لە ئەولەویەتدا نییە، بەڵکو ئامرازێکە بۆ خزمەتکردنی پرۆژەیەک کە هیچ پەیوەندییەکی بە سەروەریی خاکی کوردستان و شکۆی نەتەوەییەوە نییە.
تەوژمی کۆمۆناڵی دیموکراتی ؛ تواندنەوەی کورد لەناو بازنەی ئێراندا
ئەوەی پژاک بەناوی کۆمۆناڵی دیموکراتی یان نەتەوەی دیموکراتی بانگەشەی بۆ دەکات، هیچ نییە جگە لە هەوڵێکی ئایدیۆلۆژی بۆ سڕینەوەی سنوورە نەتەوەییەکان و ئامادەکردنی تاکی کورد بۆ ئەوەی ببێتە سووتەمەنی ئێرانێکی دیموکرات. ئەوان لە جیاتی ئەوەی کار بۆ ڕزگاریی نەتەوەیەک بکەن کە چەندین سەدەیە ژێردەستەیە، خەریکی داڕشتنی تیۆرین بۆ چۆنیەتی پێکەوەژیان لەگەڵ ئەو ناوەندەی کە چاوپۆشی لە هەموو مافە نەتەوەییەکان دەکات. لە فەرهەنگی پژاکدا، چەمکی   کوردستان بووەتە پاشکۆیەک بۆ ئێران ، ئەمەش خیانەتێکی گەورەیە لەو هەزاران شەهیدەی کە بە ئاواتی سەربەخۆیی و ئاڵای کوردستانەوە سەریان ناوەتەوە.
خوێنی گەنجی کورد و ئامانجی شکستخواردووی تاران
پرسیارە جەوهەرییەکە لێرەدا ئەوەیە: ئەگەر ئامانجی کۆتایی ئێوە تەنیا ئێرانێکی دیموکراتە ، بۆچی دەبێت گەنجی کورد لە کێوەکانی قەندیل و شاهۆ بە کوشت بدرێن؟ بۆچی دەبێت ماڵباتی کوردی ڕۆژهەڵات جەرگسووتاو بکرێن بۆ پرۆژەیەک کە ئەنجامەکەی تەنیا گۆڕینی سیستەمی سیاسی تارانە؟
پژاک بەم سیاسەتەی، کوردی کردووەتە بەکرێگیراوی ئایدیۆلۆژی. ئەوان خوێنی لاوی کورد بە هەرزان دەفرۆشن بۆ ئەوەی لە داهاتووی ئێراندا جێگەیەکیان وەک حیزبێکی سەرتاسەری هەبێت، نەک وەک نوێنەری نەتەوەیەکی ستەملێکراو. ئەمە بازرگانییەکی سیاسییە کە باجەکەی تەنیا دایکی کورد و گەنجی کورد دەیدات.
کۆنگرەی ئازادی ئێران؛ کۆتایی ماسکەکان
بەشداری و جەختکردنەوەی پژاک لە کۆنگرە گوماناوییەکانی پەیوەست بە داهاتووی ئێران، نیشانی دا کە ئەم لایەنە نەک هەر باوەڕی بە مافی چارەی خۆنووسین نییە، بەڵکو بە کردەوە بووەتە بەشێک لەو ئۆپۆزسیۆنە ئێرانییەی کە تەنانەت ئامادە نین ناوی کوردستان یش بهێنن. پژاک لەوێدا سەلماندی کە ئەوان کوردستان تەنیا وەک کارتێکی فشار بۆ بەرژەوەندییە ئایدیۆلۆژییەکانی خۆیان بەکاردەهێنن. بۆ ئەوان، گرنگ نییە کورد دەبێتە خاوەن قەوارەی خۆی یان نا، گرنگ ئەوەیە تیۆرە شکستخواردووەکانی  ئۆجەلان لە تاران تاقی بکرێتەوە.
پەیامێک بۆ خەڵکی ڕۆژهەڵات
ئیتر کاتی ئەوە هاتووە کۆمەڵانی خەڵکی ڕۆژهەڵاتی کوردستان بە ئاگا بێنەوە. نابێت ڕێگە بدرێت چیتر هەستی نەتەوەیی و وزەی گەنجەکانمان لە پێناو سەرابێکدا بەفیڕۆ بچێت. پژاک نەک تەنیا نوێنەرایەتی ویستی نەتەوەیی کورد ناکات، بەڵکو بووەتە بەربەست لەبەردەم گەشەکردنی هزری نەتەوەیی ڕەسەن لە ڕۆژهەڵات.
ئەو هێزەی شەرم بکات بڵێ  من بۆ دەوڵەت و سەروەریی کورد تێدەکۆشم  و لە جیاتی ئەوە بڵێ من ئێرانێکی دیموکراتم دەوێت، شایستەی ئەوە نییە ڕۆڵەی کوردی ڕادەست بکرێت. پێویستە خەڵک ئەو دەرفەتە لە پژاک بگرن و نەهێڵن چیتر گەنجانی ئەم نیشتمانە بکرێنە قوربانی خەونە نانەتەوەیی و شکستخواردووەکانی ئەوان.
پژاک لە تاقیکردنەوەی نەتەوەییبوودا شکستی هێنا. ئەوان لە نێوان کوردستان و ئایدیۆلۆژیایەکی ئێرانی-کۆمۆناڵی، دووەمیان هەڵبژارد. ئێستا ئەرکی ڕۆشنبیران و جەماوەرە کە ئەم ڕاستییە تاڵە بۆ هەمووان ڕوون بکەنەوە: پژاک ڕێگەیەکە کە بەرەو ئازادیی کوردستان ناچێت، بەڵکو بەرەو تواندنەوەی نەتەوەیی و تاقیکردنەوەی تیۆرە بێبایەخەکان لەسەر جەستەی گەنجی کورد دەچێت.