هەرێم نیوز
نووسینگەی جێگری سەرۆکی ئەنجوومەنی وەزیرانی هەرێمی کوردستان ئاماری خەرجی و پرۆژە خزمەتگوزارییەکانی سەر بە کابینەی نۆیەم لە پارێزگاکانی سلێمانی، هەڵەبجە و ئیدارە سەربەخۆکانی ڕاپەڕین و گەرمیانی بڵاو کردەوە و جەختی لەسەر بەردەوامیی گەشەپێدانی خزمەتگوزارییەکان کردەوە.
خەرجکردنی ٥٦٤ ملیار دینار و ئەنجامدانی ١,١٧٨ پرۆژە
ئەمڕۆ سێشەممە، ٦ی تشرینی یەکەمی ٢٠٢٦، نووسینگەی هەماهەنگی و بەدواداچوونی سەر بە جێگری سەرۆکی ئەنجوومەنی وەزیران ڕایگەیاند؛ کابینەی نۆیەم ساڵی ڕابردوو بڕی ٥٦٤ ملیار دیناری بۆ پرۆژە خزمەتگوزارییەکانی پارێزگای سلێمانی خەرج کردووە. هاوکات لە قۆناغی دوای ساڵی ٢٠٢١ـەوە لە پارێزگای هەڵەبجە و ئیدارە سەربەخۆکانی ڕاپەڕین و گەرمیان، ١،١٧٨ پرۆژە کەوتوونەتە بواری جێبەجێکردنەوە.
زۆرینەی ئەو پرۆژانە تەواو بوون و تەنیا لە کەرتی تەندروستیشدا ٧٨ ملیار دینار خەرج کراوە.
ئاماری پرۆژەکان لە سەرانسەری ناوچەکە:
• پارێزگای هەڵەبجە: لە کۆی ٣٨٦ پرۆژەی دیاریکراو، ٢١٥ پرۆژەیان جێبەجێ کراون.
•ئیدارەی سەربەخۆی ڕاپەڕین: لە کۆی ٣٣٦ پرۆژە، ١٩٩ پرۆژەیان تەواو بوون.
•ئیدارەی سەربەخۆی گەرمیان: لە کۆی ٤٥٠ پرۆژە، ٢٨٦ پرۆژەیان کەوتوونەتە خزمەت هاووڵاتییان.
کەرتی شارەوانی و قیرتاوکردنی شەقامەکان
سەبارەت بە کەرتی شارەوانی لە پارێزگای سلێمانی، لە دوای ساڵی ٢٠٢٢ـەوە ٣٤٤ پرۆژە دەستنیشان کرابوون کە ٢١٠ پرۆژەیان بە تەواوی جێبەجێ کراون. هەروەها تەنیا لەمساڵدا ٣٩٠ هەزار مەتر دووجا لە شەقامەکانی سلێمانی قیرتاو کراون. داتاکان ئاماژە بەوەش دەکەن کە سلێمانی ساڵانە پێویستی بە ١٧ ملیار دینارە بۆ پاککردنەوەی شارەکە.
پێشکەوتنی بەرچاو لە کەرتی کارەبا
لە کەرتی کارەبادا، لە کۆی ٧٦٠ پرۆژە، ٦٥٧ پرۆژەیان تەواو کراون، ئەمەش بە واتای تەواوبوونی نزیکەی ٨٦٪ی پرۆژەکانی کارەبا دێت لە کاتێکدا داهاتەکەی تەنیا ٨٪ی تێچووی پرۆژەکان دابین دەکات. سەرەڕای ئەمەش، حکوومەتی هەرێمی کوردستان بۆ ساڵی ٢٠٢٥ بڕی ٤٣ ملیار دیناری دیکەی تەنیا بۆ بەهێزکردنی کەرتی کارەبا لە ناوچەکەدا تەرخان کردووە.