هەرێم نیوز
دەستەی دەستپاکیی عێراق ڕایگەیاند، دادگای تاوانەکانی تایبەت بە بەرەنگاربوونەوەی گەندەڵی، سزای ٧ ساڵ زیندانیکردنی بۆ محەمەد فەرمان شاهر، ئەندامی ئێستای ئەنجومەنی نوێنەرانی عێراق دەرکرد.
بڕیاری دادگا و سزاکانی نەغدینە
دادگا بڕیاری داوە کە ناوبراو جگە لە سزای زیندانیکردن، ناچار بکرێت ئەو بڕە پارەیەی بە نایاسایی دەستی کەوتووە بیگێڕێتەوە، هەروەها پێبژاردنێکی دارایی هاوشێوەی ئەو بڕە پارەیەشی بەسەردا سەپێنراوە.
کۆی گشتیی ئەو پارەیەی کە دەبێت بیگێڕێتەوە و ئەو پێبژاردنەی کە دەبێت بیدات، دەگاتە زیاتر لە ٢٨ ملیار دیناری عێراقی.
ماددەی یاسایی و وردەکاریی پارە براوەکە
دەستەی دەستپاکیی عێراق ڕایگەیاند، سزای سەرەکی بۆ محەمەد فەرمان شاهر زیندانیکردنیەتی بۆ ماوەی ٧ ساڵ بەپێی ماددەی ١٩ی یاسای دەستەی دەستپاکی و دەوڵەمەندبوونی نایاسایی ژمارە ٣٠ی ساڵی ٢٠١١.
هەروەها گەڕانەوەی ئەو پارەیەی کە بردوویەتی کە بڕەکەی ١١,٧٩٥,٩٤٩,٢٣٨ دیناری عێراقی و ١,٧٢٩,٣٠٠ دۆلاری ئەمریکییە، بەهاکەی بە کۆی گشتی دەگاتە ٢٨,١٥٧,٢٥٠,٤٧٦ دینار.
سزای شاردنەوەی سەروەت و دەستبەسەرداگرتنی موڵکەکان
هەروەها دادگا سزایەکی دیکەی ٣ ساڵ زیندانیکردنی بۆ ناوبراو دەرکردووە بە تۆمەتی شاردنەوەی سەروەت و سامان، بەڵام بڕیار دراوە تەنیا سزای قورسترین (٧ ساڵەکە) جێبەجێ بکرێت.
جگە لەوەش، دادگا بڕیاری داوە بە پشتڕاستکردنەوەی دەستبەسەرداگرتنی موڵک و ماڵی گواستراوە و نەگواستراوەی تۆمەتبارەکە.
داواکردنی قەرەبوو لەلایەن دەستەی دەستپاکی
دەستەی دەستپاکی ئاماژەی بەوەش کردووە، کە مافی خۆیانە دوای ئەوەی بڕیارەکە پلەی کۆتایی وەرگرت، داوای قەرەبووی زیانەکان بکەن.