هەرێم نیوز
وەزارەتی نەوتی عێراق تێپەڕینی سەلامەتی کەشتییە نەوتهەڵگرەکانی لە گەرووی هورمز ڕادەگەیەنێت و ئاماژە بە باشتربوونی ئاستی هەناردەکردن و بەردەوامیی فرۆشتنی نەوتی خاو دەکات.
تێپەڕینی کەشتییەکان و چاودێریی سۆمۆ
ئەمڕۆ سێشەممە ٤ی ئابی ٢٠٢٦، سەلیم ڕکابی، وتەبێژی وەزارەتی نەوتی عێراق ڕایگەیاند، جووڵەی گواستنەوەی نەوتی خاوی عێراق لە ڕێگەی گەرووی هورمزەوە بەردەوامە و کەشتییە نەوتهەڵگرەکانیان بە شێوەیەکی ئاسایی و بە سەلامەتی بە گەرووەکەدا تێدەپەڕن.
وتەبێژی وەزارەتی نەوت ڕوونی کردەوە، دوای تێپەڕاندنی گەرووەکە، بەرپرسیارێتیی ڕێڕەوی کەشتییەکان و وەرگرتنی مۆڵەتە پێویستەکان بە تەواوی دەکەوێتە ئەستۆی کڕیارەکان، چونکە وەزارەت خاوەندارێتی ئەو کەشتییانە ناکات کە بارستەی بەشێکیان دەگاتە دوو ملیۆن بەرمیل نەوت. هاوکات ئاماژەی بەوە دا کە کۆمپانیای بەبازاڕکردنی نەوتی عێراق (سۆمۆ) بە بەردەوامی و لە ڕێگەی سیستەمی جیهانیی چاودێرییەوە بەدواداچوون بۆ جووڵەی کەشتییەکان دەکات تاوەکو دەگەنە پاڵاوگەکان.
بەرزبوونەوەی ئاستی هەناردەکردنی نەوت
سەبارەت بە ئاستی هەناردەکردن، سەلیم ڕکابی جەختی لەسەر باشتربوونی پلە بە پلەی فرۆشی نەوتی عێراق کردەوە لە مانگەکانی دواییدا و ڕایگەیاند، ئەنجامی فرۆشتنی مانگی ڕابردوو بەراورد بە مانگەکانی پێشوو زۆر باشتر بووە، ئەمەش ئاماژەیەکی ڕوونە بۆ چاکبوونەوەی بەردەوامی ئاستی هەناردەکردن دوای ئەو قەیرانەی ڕووبەڕووی گواستنەوە لە گەرووی هورمزدا بووبووەوە.
ئەم ڕاگەیاندنەی وەزارەتی نەوت لە کاتێکدایە، دوێنێ دووشەممە ٣ی ئابی ٢٠٢٦، وەزیری نەوتی عێراق ئاشکرای کردبوو کە لە گفتوگۆی بەردەوامدان لەگەڵ تاران تاوەکو کەشتییە نەوتهەڵگرەکانی عێراق بەبێ ڕێگری لە گەرووی هورمز تێپەڕن.