هەرێم نیوز
بەپێی نوێترین ڕاپۆرتە مەیدانییەکان، شەپۆلی هێرشە ئاسمانییەکانی ئەمریکا و ئیسرائیل بۆ سەر ئێران گەیشتووەتە ئاستێکی بێپێشینە و ئامانجە سەرەکییەکان ناوەندە پیشەسازی و ستراتیژییەکانی وزەن.
گرنگترین ئامانجەکانی هێرشەکەی ئەمڕۆ:
• کەرتی پترۆکیمیایی لە ئەهواز: ٥ دامەزراوەی گەورەی پترۆکیمیایی لە ناوچەی ئەهواز کراونەتە ئامانج. ئەم ناوچەیە دڵی پیشەسازیی نەوت و غازی ئێرانە و ئەم هێرشانە گورزێکی کوشندە لە توانای بەرهەمهێنانی وڵاتەکە دەوەشێنن.
• فڕۆکەخانەی نێودەوڵەتیی چابەهار: لە باشووری ڕۆژهەڵاتی ئێران، تانکییەکانی سووتەمەنی لە فڕۆکەخانەی نێودەوڵەتیی چابەهار بۆردومان کراون، کە ئەمە کاریگەریی ڕاستەوخۆی لەسەر لۆجیستیکی سەربازی و گواستنەوەی مەدەنی دەبێت لەو ناوچە ستراتیژییەی کەناری دەریای عومان.
• گورزە هەرە بەهێزەکە: بەپێی زانیارییەکان، یەکێک لە کۆمەڵە پترۆکیمیاییەکان کە نێزیکەی ٦٥٪ بۆ ٧٠٪ی پێداویستیی بەنزین و کەرەستە بنەڕەتییەکانی تری ناوخۆی ئێران دابین دەکات، زیانی زۆر قورسی بەرکەوتووە. ئەمە دەبێتە هۆی دروستبوونی قەیرانێکی گەورەی سووتەمەنی لە سەرتاسەری وڵاتدا.
ستراتیژی نوێی هێرشەکان:
لە ماوەی دوو ڕۆژی ڕابردوو و بەتایبەت ئەمڕۆ، دیارە کە ستراتیژی هێرشەکان لە ئامانجی سەربازییەوە گۆڕاوە بۆ پەکخستنی ژێرخانی ئابووری. چڕبوونەوەی هێرشەکان لەسەر شارە پیشەسازییەکان و ناوەندەکانی پترۆکیمیایی نیشانی دەدات کە هاوپەیمانان دەیانەوێت سەرچاوە دارایی و وزەییەکانی تاران بە تەواوی وشک بکەن.
ئەم پەرەسەندنانە لە کاتێکدایە کە ترەمپ باسی لە "پاراستنی نەوت" کردووە و لە باکووری تارانیش بەرزاییەکانی جەمەران و دەربەند کراونەتە ئامانج.