هەرێم نیوز
بەشدار بازیانی، ڕۆژنامەنووس، لە زانیارییەکی هەستیاردا ئاشکرای کردووە کە پەرلەمانتارێکی کورد تێوەگلاوە لە پێدانی زانیاریی هەواڵگری و لۆکەیشن بە گرووپەکانی "حزبوڵڵا" و "نوجەبا" بە مەبەستی بەئامانجگرتنی ناوچەکانی هەرێمی کوردستان.
ئەمڕۆ چوارشەممە، دوای زنجیرەیەک هێرشی درۆنی و موشەکی بۆ سەر سلێمانی و هەولێر، بەشدار بازیانی ڕەخنەی توندی لە هەڵوێستی هەندێک فیگەر و پەرلەمانتاری کورد گرت و داوای کرد کاتی "حەق و حیساب" هاتووە.
خاڵە سەرەکییەکانی زانیارییەکانی بەشدار بازیانی:
• سیخوڕیی پەرلەمانتاران: ئاماژەی بەوە کردووە پەرلەمانتار هەیە لەژێر ناوی "دژایەتیی پارتی و یەکێتی" بووەتە "عەمیلی حەشد و میلیشیاکان" و لە کۆبوونەوە ئەمنییەکاندا لۆکەیشنی داوەتە لایەنە دەرەکییەکان بۆ ئەنجامدانی هێرش.
• شانە نوستووەکانی ئیتلاعات: بازیانی هێرشی کردووەتە سەر ئەو نووسەر، فیگەر و مەلا ئاینییانەی کە بە ناوی "دژایەتیی سەهیۆنیەت" بوونەتە چاوساغی پاسداران و لە ناوخۆی کوردستانەوە داوای بەئامانجگرتنی زانکۆ و ناوەندە سیاسییەکان دەکەن.
• داوای جوڵاندنی داواکاری گشتی: داوای لە داواکاری گشتی کردووە دەستبەجێ سکاڵا بجوڵێنێت، چونکە بە وتەی ئەو، "ئەم ئەتوارە لە هەر وڵاتێکی تردا بکرێت، توندترین سزای بەسەردا دەسەپێنرێت."
ئەم لێدوانە توندانە لە کاتێکدایە کە:
١- شەوی ڕابردوو و ئەمڕۆ چەندین هێرشی درۆنی کرایە سەر کۆگاکانی ڕۆن لە هەولێر و ناوچە جیاوازەکانی سلێمانی.
٢- هێرشەکان هاوکاتن لەگەڵ هەڕەشە بەردەوامەکانی گروپە چەکدارەکان دژی هەرێمی کوردستان لە چوارچێوەی جەنگی ئێران و ئەمریکادا.
٣- زیادبوونی گرژییە نێوخۆییەکان لەسەر پرسی "خۆسەپاندنی میلیشیاکان" لە ناوچە جێناکۆکەکان و سنوورەکانی هەرێم.