هەرێم نیوز
شاخەوان عەبدوڵڵا، ڕایگەیاند کە تا ئێستا هیچ بڕە پارەیەک بۆ شایستە داراییەکانی جوتیارانی هەرێم سەرف نەکراوە و ئەو هەواڵانەی لە میدیاکان بڵاوکراونەتەوە، لێکدانەوەی هەڵەن بۆ نووسراوەکانی وەزارەتی بازرگانی.
شاخەوان عەبدوڵڵا لە ڕوونکردنەوەیەکدا بۆ ڕای گشتی، وەڵامی ئەو دەنگۆیانەی دایەوە کە باس لە ناردنی پارەی جوتیاران دەکەن. ناوبراو ڕەخنەی توندی لەو پەرلەمانتار و کەناڵانە گرت کە بەبێ وردبوونەوە لە دەقی نووسراوە عەرەبییەکان، هەواڵی نادروستیان بڵاوکردووەتەوە.
خاڵە سەرەکییەکانی ڕوونکردنەوەکەی شاخەوان عەبدوڵڵا:
• ڕەتکردنەوەی سەرفکردنی پارە: جەختی کردەوە کە هیچ پارەیەک نەخراوەتە سەر هەژماری وەزارەتی بازرگانی تاوەکو دابەش بکرێت. ئەو بڕە پارەیەی باس دەکرێت (126 ملیار دینار)، کۆی ئەو پارەیەیە کە وەزارەتی بازرگانی لە سەرەتاوە تا ئێستا بۆ هەرێمی ناردووە، نەک بڕە پارەیەکی نوێ.
• ڕەزامەندی هەیە بەڵام پارە نییە: ئاشکرای کرد کە وەک فراکسیۆنی پارتی چەندین نووسراو و ڕەزامەندیی سەرۆکوەزیران و وەزارەتیان وەرگرتووە، بەڵام بڵاویان نەکردووەتەوە، چونکە دەزانن وەزارەتی دارایی عێراق هێشتا پارەکەی تەمویل نەکردووە.
• پێشنیارێکی ڕەتکراوە: شاخەوان عەبدوڵڵا پێشنیاری کردبوو داهاتی ئەو گەنمەی لە سایلۆکانی هەرێم دەفرۆشرێت بدرێتە جوتیاران، بەڵام وەزیری دارایی عێراق ڕەتیکردووەتەوە و ڕایگەیاندووە "پارەم بۆ مووچە پێویستە".
• پەیام بۆ پەرلەمانتاران: داوای لە پەرلەمانتار و فراکسیۆنەکان کرد کە "هەواڵێک ڕاست نییە مەیاندەن بە ڕاگەیاندن"، چونکە دواجار متمانەی خەڵک و جوتیاران لەدەست دەدەن.
پوختەی دۆخەکە بۆ جوتیاران:
بەپێی ئەم ڕوونکردنەوەیە، کێشەی سەرەکی لە "وەزارەتی دارایی عێراق"ـە کە ئامادە نییە پارە بخاتە سەر هەژماری وەزارەتی بازرگانی بۆ شایستەی جوتیاران، بەو هۆیەشەوە پرۆسەی خەرجکردنی پارەکە لە چاوەڕوانیدا دەمێنێتەوە.
بەڵگەکان کە دکتۆر شاخەوان بڵاویکردۆتەوە:
