هەرێم نیوز
کونسوڵخانەی گشتیی ویلایەتە یەکگرتووەکانی ئەمریکا لە هەولێر، پەیامێکی ئاگادارکردنەوەی ئاراستەی سەرجەم هاووڵاتییانی ئەمریکی لە هەرێمی کوردستان کرد و داوای لێکردن بە وریاییەوە مامەڵە لەگەڵ پێشهاتە ئەمنییەکاندا بکەن.
ئەم هۆشدارییەی کونسوڵخانە لە کاتێکدایە کە لە دوێنێ شەوەوە، شەپۆلێکی ناڕەزایەتی لە هەولێر و شارەکانی دیکەی هەرێمی کوردستان دژی "بێهەڵوێستیی واشنتن" بەرامبەر هێرشی گرووپە چەکدارەکان بۆ سەر ڕۆژئاوای کوردستان دەستیپێکردووە.
کونسوڵخانە ئاماژەی بەوە کردووە:
• پەرەسەندنی خێرا: خۆپێشاندانەکان دەکرێت بێ ئاگادارکردنەوەی پێشوەختە پەرەبسەنن و ببنە هۆی پچڕانی هاتوچۆ و خزمەتگوزارییەکان.
• مەترسیی توندوتیژی: هۆشداری دراوە کە ئەگەری هەیە هەندێک لە گردبوونەوەکان بەرەو توندوتیژی بڕۆن.
کونسوڵخانە داوا لە هاووڵاتییانی وڵاتەکەی دەکات ئەم هەنگاوانە بگرنە بەر:
١. دوورکەوتنەوە: لەو شوێنانەی گردبوونەوە و ناڕەزایەتییان تێدا ئەنجام دەدرێت دوور بکەونەوە.
٢. بەدواداچوون: لە ڕێگەی میدیا ناوخۆییەکانەوە چاودێریی وردی دۆخەکە بکەن بۆ وەرگرتنی زانیاریی نوێ.
٣. ئاستی مەترسی: وەزارەتی دەرەوەی ئەمریکا جەختی کردووەتەوە کە هێشتا ئاستی مەترسیی گەشت بۆ عێراق لە پلەی چوارەمدایە (گەشت مەکە)، ئەوەش بەهۆی مەترسییەکانی تیرۆر، ڕفاندن و ململانێی چەکداری.