هەرێـ نیوز
مەزڵوم عەبدی، فەرماندەی گشتیی هێزەکانی سووریای دیموکرات (هەسەدە)، لە پەیامێکی فەرمیدا ڕایگەیاند کە لە ڕێگەی نێوەندگیریی نێودەوڵەتییەوە گەیشتوونەتە لێکتێگەیشتنێک بۆ ڕاگرتنی شەڕ لە گەڕەکەکانی شێخ مەقسوود و ئەشرەفییە لە شاری حەلەب.
فەرماندەی گشتیی هەسەدە لە سەکۆی (X) ئاشکرای کرد، ڕێککەوتنەکە دەبێتە هۆی ڕاگەیاندنی ئاگربەست و دەستپێکردنی پڕۆسەی هێنانەدەرەوەی تەرمی شەهیدان، بریندارەکان و ئەو هاووڵاتییە مەدەنییانەی لەو دوو گەڕەکەدا گیرییان خواردووە، لەگەڵ کشانەوەی شەڕڤانان بەرەو ناوچەکانی باکوور و ڕۆژهەڵاتی سووریا (ڕۆژئاوا).
مەزڵوم عەبدی داوای لە لایەنە ناوبژیوانەکان کرد کە پابەندی بەڵێنەکانیان بن بۆ وەستاندنی پێشێلکارییەکان و کارکردن بۆ گەڕانەوەی ئاوارەکان بە سەلامەتی بۆ سەر ماڵ و حاڵی خۆیان. عەبدی لە کۆتایی پەیامەکەیدا، سڵاوی بۆ تێکۆشەرانی "بەرخۆدانی شێخ مەقسوود" نارد و سەرەخۆشی لە بنەماڵەی شەهیدان کرد.