هەرێم نیوز
ئەمڕۆ سێشەممە ٦ی ١ی ٢٠٢٦، گەڕەکی شێخ مەقسوود لە شاری حەلەب کە ناوچەیەکی کوردنشینە، ڕووبەڕووی هێرشی درۆنی گرووپە چەکدارەکانی سەر بە وەزارەتی بەرگریی "حکوومەتی کاتی" سووریا بووەوە و بەهۆیەوە قوربانی لێکەوتەوە.
بەگوێرەی ڕاگەیەندراوی هێزەکانی ئاسایشی ناوخۆ لە ناوچەکە، لە ئەنجامی هێرشێکی درۆنی بۆ سەر گەڕەکەکە، هاووڵاتییەک شەهید بووە. هاوکات لە هێرشێکی تری هاوشێوەدا بۆ سەر ناوچەی (شەقیف) لە باکووری شێخ مەقسوود، دوو برا بە ناوەکانی (محەمەد ڕزوان و ڕزگار ڕزوان) بریندار بوون.
ئەم پێشێلکارییە لە کاتێکدایە کە لە نیسانی ڕابردووەوە ئاگربەست لە نێوان هێزەکانی سووریای دیموکرات (هەسەدە) و حکوومەتی کاتی واژۆ کراوە. هێرشەکە دوای ئەوە دێت کە دوێنێ وەزارەتی بەرگریی سووریا هەسەدەی تۆمەتبار کرد بە هێرشکردنە سەر سەربازەکانیان لە دێرحافر، بەڵام هەسەدە بە توندی ئەو تۆمەتانەی ڕەتکردەوە و بە "بێ پاساو و گوماناوی" وەسفی کردن.
گەڕەکی شێخ مەقسوود و ئەشرەفییە لە حەلەب، بەهۆی پێگەی ستراتیژی و کوردنشینییانەوە، هەمیشە لەژێر فشاری گرووپە چەکدارە جیاوازەکاندا بوون. ڕێککەوتنی ١ی نیسانی ڕابردوو ئامانج لێی سەقامگیرکردنی ناوچەکە و سپاردنی ئەرکی ئەمنی بوو بە ئاسایشی ناوخۆ، بەڵام بەردەوامیی هێرشە درۆنییەکان ئاماژەیە بۆ ناسکیی ئەو ئاگربەستە. چاودێران پێیان وایە ئەم جۆرە پەرەسەندنانە مەترسیی هەڵگیرسانەوەی شەڕی ناوخۆیی لە حەلەب و دەوروبەری زیاتر دەکات، بەتایبەت لە کاتێکدا کە لایەنەکان یەکتر بە پێشێلکردنی ڕێککەوتنەکان تۆمەتبار دەکەن.