هەرێم نیوز
فیدراسیۆنی تۆپی پێی ئەورووپا رەزامەندیی لەسەر گەڕانەوەی بارسێلۆنا بۆ یاریگەی کامپ نو دا و یاریی داهاتووی یانەکە لە چامپیۆنزلیگ لەو یاریگەیە بەڕێوەدەچێت، بەڵام سوود لە بەشێکی دیاریکراوی یاریگەکە وەردەگیرێت.
یۆفا لە راگەیەندراوێکدا فەرمیدا داواکاریی بارسێلۆنا بۆ گەڕانەوەی بۆ نێو یاریگەی خۆی قبوڵکرد، بە لەبەرچاوگرتنی جێبەجێکردنی هەموو ئەو مەرجە داواکراوانەی کە پێویستن.
بەمەش یاریی داهاتووی یانەکە لە خولی یانە پاڵەوانەکانی ئەورووپا کە رۆژی 9ـی مانگی داهاتوو دەکرێت و بارسێلۆنا میوانداریی ئینتراخت فرانکفۆرتی ئەڵمانی دەکات دەبێتە یەکەم یاریی بارسا دوای گەڕانەوەی بۆ کامپ نو، بەڵام پێشبینی دەکرێت لە قۆناخی یەکەمی گەڕانەوەی یانەکەدا تەنیا 45 هەزار هاندەر بتوانن لە یاریگەدا ئامادەبن.
بارسێلۆنا لە راگەیەندراوێکی فەرمیدا دەڵێت "بارسێلۆنا خۆشحاڵە بەوەی دەتوانێت جارێکی دیکە لە یاریگەی خۆیدا رکابەری بکات و بەردەوامبێت لە پڕۆژەی گۆڕانکاریکردنی گشتگیر لە کامپ نوی نوێ.
جگە لەوەش رۆژی شەممە لە رکابەرییەکانی خولی ئیسپانیادا، بارسێلۆنا هەر لەو یاریگەیە بەرامبەر یانەی ئاتلێتیک بیلباو یاری دەکات، دوای ئەوەی چەند رۆژێک لەمەوبەر یەکەیەکی مەشقی کراوەی بە ئامادەبوونی هاندەران ئەنجامدا و زیاتر لە 20 هەزار هاندەر تێیدا ئامادەبوون.
پلانی بارسێلۆنا ئەوەیە یاریگەکە بەشێوەیەکی زۆر جوان و جیاواز ئامادەبکات و لە داهاتوودا 105 هەزار هاندەر بتوانن لە یاریگەکەدا سەیری یارییەکان بکەن.
بڕیاربوو مانگی 11ـی ساڵی رابردوو بلاوگرانا لەگەڵ ساڵیادی 125ـەمی یانەکە بگەڕێتەوە، بەڵام وادەی گەڕانەوە چەندجارێک دواخرا و رۆژی شەممە یانەکە دوای دوو ساڵ و پێنج مانگ و 25 رۆژ کە بە دیاریکراوی دەکاتە 909 رۆژ دەگەڕێتەوە نێو یاریگەی کامپ نو.