هەرێم نیوز
ڕۆژنامەی ئیسرائیلی "ئیسرائیل هیوم"، لە شیکارییەکدا سەبارەت بە هەڕەشەکانی ئێران، ئاشکرای دەکات کە لە کاتی "شەڕی ١٢ ڕۆژە"دا، کابینەی جەنگی ئیسرائیل بە ئەنقەست خۆی لە جێبەجێکردنی دوو بژاردەی ستراتیژی کوشندە پاراستووە؛ بەڵام جەخت دەکاتەوە کە ئەم بژاردانە—لەوانە 'لابردنی سەرکردایەتی ئێران' (واتە کوشتنی خامنەیی)—هێشتا کاریگەر و گونجاون بۆ وەستاندنی تاران لە سەرکێشییەکانی.
ڕۆژنامە ئیسرائیلییەکە ڕایگەیاندووە کە لە ئۆپەراسیۆنی شێری هەستاودا، سوپای ئیسرائیل بە فەرمانی ئەنجومەنی وەزیران خۆی لەم دوو هەنگاوە ستراتیژییە بەدوور گرت:
یەکەم لابردنی ڕێبەری ئێران: ڕۆژنامەکە نووسیویەتی بژاردەی کوشتنی عەلی خامنەیی، ڕێبەری کۆماری ئیسلامی، لەو کاتەدا جێبەجێ نەکرا، "بەڵام هێشتا ئەگەری هەیە".
دووەم: فلجکردنی تەواوی ئابووری ئێران وەک کارتێکی فشار.
ڕۆژنامەکە بە ڕوونی ئاماژە بەوە دەکات کە هەردوو بژاردەکە وەک "ئامانجەکانی دوورخستنەوەی تاران لە هەڕەشەی سەربازی" ماونەتەوە.
لەلایەکی ترەوە، ڕۆژنامەی ئیسرائیل هیوم لە شیکارییەکەیدا جەخت لەسەر ئەوە دەکاتەوە کە تاران لە گەڕانەوەی تەواو بۆ چالاکیی ئەتۆمی خۆی دەپارێزێت، بەڵام لەگەڵ ئەوەشدا خەریکی بنیاتنانەوەی پڕۆگرامە ئەتۆمییەکەیەتی."
ئەمە ئاماژەیە بۆ ئەوەی کە ئێران لە دروستکردنی توانای ئەتۆمی لە ژێر زەویدا بەردەوامە، بەبێ ئەوەی بە تەواوی ئاشکرای بکات.
بە گوێرەی بەرپرسانی ئیسرائیلی، "ئێران خوازیاری دەستپێکردنی شەڕێکی تر نییە، بەڵام لە هێرشی ئیسرائیل دەترسێت.
لە ئیسرائیل، بەرپرسەکان هێشتا بە ئومێدن کە ناڕەزایەتییە ناوخۆییەکانی ئێران بەبێ شەڕ بتوانن ببنە هۆی گۆڕانکاری لە دۆخەکەدا.
لە هەمان کاتدا، ئەم ناڕەزایەتییانە ببێتە هۆی "وشککردنی تەواوی سەرچاوە داراییەکانی حیزبوڵا و حەماس".
لێکۆڵینەوەکان دەریدەخەن کە ئیسرائیل کاتی خۆی هەوڵی کوشتنی خامنەیی داوە، بەڵام پلانەکە لەو کاتەدا نەچووەتە بواری جێبەجێکردنەوە.
وەزیری بەرگری ئیسرائیل، ئیسرائیل کاتز، هەڕەشەی ڕاستەوخۆی لە خامنەیی کردووە و وتوویەتی: "پێم وایە دیکتاتۆرێک وەک خامنەیی، کە سەرکردایەتی وڵاتێکی وەک ئێران دەکات و مەبەستی تێکدانی دەوڵەتی ئیسرائیلە، ڕێگەی پێ نادرێت بەردەوام بێت یان ئەوە بهێنێتە دی."
هەندێک سەرچاوە ئاماژە بەوە دەکەن کە خامنەیی لە کاتی ئەو شەڕەدا چووەتە شوێنێکی زۆر قووڵی ژێرزەوی و پەیوەندییەکانی لەگەڵ فەرماندەکان پچڕاندووە، ئەمەش بووەتە هۆی ئەوەی کە بژاردەی کوشتنی لە ڕووی عەمەلییەوە ئەنجام نەدرێت.
هەندێک شرۆڤەکار باس لەوە دەکەن کە تەنانەت ئەگەر بکوژرێت، سیستمی ئایینی ئێران پرۆسەیەکی دامەزراوی هەیە بۆ جێگرتنەوەی ڕێبەر، بەڵام کوشتنی خامنەیی دەبێتە سووتەمەنی بۆ هەوڵی گۆڕینی ڕژێم لەلایەن ناڕازییە ناوخۆییەکانەوە.
زۆربەی ڕاپۆرتە هەواڵییەکانی ئیسرائیل (وەک ئەو باسەی ڕۆژنامەی ئیسرائیل هیوم) ئاماژە بەوە دەکەن کە "لابردنی ڕێبەرایەتی ئێران" یان بە شێوەیەکی ڕوونتر کوشتنی عەلی خامنەیی، بژاردەیەکی "ستراتیژیی توند"ە و هێشتا لەسەر مێزی ئیسرائیلە.
مەبەستی سەرەکی لە جێبەجێکردنی ئەم بژاردە کوشندەیە، شۆککردنی سیستمەکەیە، و ناردنی پەیامێکی زۆر بەهێزە بۆ ئێران بۆ ئەوەی دەستبەرداری سەرکێشییە سەربازییەکان بێت. هەروەها وەک کارتێکی یاری سەیر دەکرێت بۆ وەستاندنی پڕۆگرامە ئەتۆمییەکەی.