هەرێم نیوز
یەکەم حاڵەتی تووشبوون بە تای خوێنبەربوون لە هەرێمی کوردستان تۆمارکرا. ئەمەش دوای بوونی ژمارەیەکی زۆری نەخۆشی تای خوێنبەربوون لە شارەکانی دیکەی عێراق و ژمارەیەک لە حالەتەکان لە شاری کەرکوک و بوونی گیانلەدەستدان بەو نەخۆشیە.
ئەمڕۆ هەینی، سەرکار سورچی وتەبێژی وەزارەتی تەندروستی ڕایگەیاند: دوای بەدواداچوون و پشکنین بۆ نەخۆشێکی گومانلێکراو لەماوەی دوو ڕۆژی ڕابردوو. ئەمڕۆ دوای دڵنیابوونەوە و پشتڕاستکردنەوەی پشکنینەکان یەکەم حاڵەتی تای خوێنبەربوون لە هەرێمی کوردستان تۆمارکرا.
دەشڵێت: تووشبووەکە هاوڵاتییەکی شاری کۆیەیە، تەمەنی 42 ساڵە و پیشەی گۆشتفرۆشە. لە ئێستادا لە نەخۆشخانەیەکی شاری هەولێر چارەسەری پزیشکی وەردەگرێت و دۆخی تەندروستی تا ئێستا جێگیرە.
ئاماژە بەوەشکراوە: داوا لە هاوڵاتیان دەکەین و جەخت دەکەینەوە لەسەر جێبەجێکردنی ڕێنماییەکانی وەزارەتی تەندروستی، لەکاتی هەبوونی نیشانەکانی نەخۆشی لەسەر ئاژەڵ پێویستە تیمەکانی ڤێترنەری ئاگاداربکەنەوە. یان هاوڵاتیانی بەرکەوتووانی بەخێوکردنی ئاژەڵ یان بەرهەمەکانی ئاژەڵ لەکاتی بوونی هەر نیشانەیەکی ناتەندروست، سەردانی نەخۆشخانەکان بکەن.