هەرێم نیوز
بارزانی لە ساڵیادی بۆردوومانکردنی قەڵادزێ و زانکۆی سلێمانی ڕایدەگەیەنێت، بۆردوومانەکە "لاپەڕەیەکی ڕەشی دڕندەیی و بێ باکیی ڕژێمی پێشووی عێراقە لە بەرانبەر گەلی کوردستان".
ئەمڕۆ چوارشەممە 24ی نیسانی 2024، بارزانی لە پەنجایەمین ساڵیادی بۆدومانکردنی قەڵادزێ و زانکۆی سلێمانی لە تۆڕی کۆمەڵایەتی ئێکس پەیامێکی بڵاوکردەوە و تێیدا هاتوە،" بۆردومانکردنی قەڵادزێ و زانکۆی سلێمانی لاپەڕەیەکی ڕەشی دڕندەیی و بێ باکیی ڕژێمی پێشووی عێراقە لەبەرانبەر گەلی کوردستان."
بارزانی ئاماژەی بەوەشداوە، لە پەنجایەمین ساڵیادی بۆردومانی زاڵمانەی قەڵادزێ و زانکۆی سلێمانیدا سڵاو بۆ گیانی شەهیدانی ئەو کارەساتە و هەموو شەهیدانی کوردستان.
ئەمڕۆ 50 ساڵ بەسەر بۆردومانکردنی زانکۆى سلێمانى لە قەڵادزێ تێدەپەڕێت کە لە پەلامارێکی دڕندانەدا ئەو شارە بە چەکی قەدەغەکراوی نێودەوڵەتی بۆمباران کراو بێجگە لە بونە قوربانى و ئاوارەیی سەدان کەسى سڤیل لە دانیشتوانەکانى، دەیان خوێندکارو مامۆستا و فەرمانبەرانی زانکۆی سلێمانی کە ئەوکات لە قەڵادزێ بوو شەهیدو بریندار بون.