محەمەد جەمال – هەولێر
سەرۆکی یەکێتی مامۆستایانی کوردستان سەبارەت بە مووچەی مامۆستایان دەڵێت" لەو بڕوایەدا نین کە مووچەی مامۆستایانی هەرێم بخرێتە سەر عێراق و دەستخۆشیش لەهەر لایەنێک دەکەین کە هەوڵ بۆ سەرخستنی بدات.
ئەحمەد گەرمیانی، سەرۆکی یەکێتی مامۆستایانی کوردستان بۆ هەرێم نیوز سەبارەت بە ڕەوشی خوێندن لە هەرێمی کوردستان و بە تایبەت پارێزگای سلێمانی ڕایدەگەیەنێت، دەستخۆشی لەهەر کەس و لایەنێک دەکەین کە هەوڵ بدات بۆ سەرخستنی ئەو بارودۆخەی کە هەیە سەبارەت پرۆسەی خوێندن و چارەسەری کێشەکان.
دەشڵێت، هەموومان ئەوە دەزانین کە کێشەکان لە بەغداوە دەستی پێکرد، هەروەها ناکۆکی سیاسی هەیە لە نێوان هەولێر و بەغدا.
ڕوونیشی دەکاتەوە کە لە مانگی ١٠ـی ساڵی ڕابردوو کۆبوونەوەیەک لەنێوان وەفدی حکومەتی هەرێمی کوردستان و لیژنەی دارایی ئەنجوومەنی نوێنەرانی عێراق بەڕێوەچوو، لەو کۆبوونەوەیەدا لیژنەکە دانی بەوەنا کە کەموکوڕییەک لە یاسای بودجەی عێراق بۆ ساڵی ٢٠٢٣ و ٢٠٢٤ و ٢٠٢٥دا هەیە و دەبێ ئەو یاسایە هەمووار بکرێتەوە، بەڵام دەبێ یەکەمجار ئەنجوومەنی وەزیران نووسراوێک ئاراستەی سەرۆکایەتی پەرلەمان بکات، بۆئەوەی دانیشتنی لەسەر بکرێت و گفتوگۆی لەبارەوە بکرێت، ئینجا هەموواربکرێتەوە.
وتیشی، لەو بڕوایەدا نین مووچەی مامۆستایانی هەرێم بخرێتە سەر بەغدا، بەڵام دەبێت عێراق ئەو مووچەیەمان بۆ دابین بکات، عێراقیش ئامادە نیە ئەوە بکات، لەبەرئەوەی حکومەتی عێراق ئامادە نەبوو مووچەی ٨ هەزار مامۆستای کەرکووک بخاتە سەر بەغدا.
لەبارەی بایکۆتی مامۆستایانیش لە سنوری پەروەردەکانی سلێمانی، گەرمیانی ڕایگەیاند' دانیشتن لەنێوان وەزارەتی پەروەردە و دامودەزگاکانی تر بۆ ئەم پرسە هەیە، بۆئەوەی خوێندن لە وەرزی دووەم دەست پێبکاتەوە، هەروەها پرسی هەژمار نەکردنی خوێندن بۆ ئەمساڵ لەلایەن وەزارەتی پەروەردەوە دەمێنێتەوە کە بڕیاری لەسەر بدات.