دواین هەواڵ

کوردستان‌

 23/07/2021

ئاژانسی پاراستن و زانیاری/زانیاری رونكردنه‌وه‌یه‌كی بڵاوكرده‌وه‌

  1. هەرێم نیوز
    وته‌بێژی سه‌رۆكی ئاژانسی پاراستن و زانیاری/زانیاری له‌رونكردنه‌وه‌یه‌كدا بۆ رایگشتی رایگه‌یاند،  لێكۆڵینه‌وه‌ له‌سه‌ر گومانه‌كانی خراپ به‌كارهێنانی ده‌سه‌ڵات، یه‌كێكه‌ له‌ ئه‌ركه‌كانیان و  رێگاناده‌ن، ناویان بۆ مه‌رام و به‌رژه‌وه‌ندی تایبه‌تی هیچ كه‌سێك به‌كاربهێندرێت.

    له‌رونكردنه‌وه‌یه‌كدا وته‌بێژێك به‌ناوی ئاژانسی پاراستن و زانیاری/زانیاری رایگه‌یاندوه‌، لێكۆڵینه‌وه‌كردن له‌گومانه‌كانی خراپ به‌كارهێنانی ده‌سه‌ڵات یه‌كێكه‌  له‌ئه‌ركه‌ له‌ پێشینه‌كانیان، دڵنیابن رێگه‌ ناده‌ین ناوی ئاژانس بۆ مه‌رام و به‌رژه‌وه‌ندیی تایبه‌تی هیچ كه‌سێك به‌كاربهێندرێت.

    ئه‌وه‌شی خستوه‌ته‌ڕو، "به‌ڵێنتان پێ ده‌ده‌ین هه‌ركه‌سێك له‌ هه‌ر پله‌ و پایه‌یه‌كدا بوبێت تێوه‌گلابێت له‌ تاوان و كاری نایاسایی، ده‌ستگیر ده‌كرێت، راپێچی به‌رده‌م یاسا ده‌كرێت و رایگشتییش له‌ ئه‌نجامی لێكۆڵینه‌وه‌ و سزادانی‌‌ ئاگادار ده‌كرێته‌وه‌، هاوكات رێكاری یاسایی ده‌گیرێته‌ به‌ر به‌رامبه‌ر هه‌ر كه‌س و لایه‌نێك كه‌ بیه‌وێت به‌ بڵاوكردنه‌وه‌ی هه‌واڵی بێ بنه‌ما، ئه‌رك و ماندوبونی ئه‌فسه‌رانمان بخاته‌ ژێر پرسیار، و گێره‌شێوێنی بكات تا ناو و ناوبانگیان بزڕێنێت".


    رونكردنه‌وه‌یه‌ك بۆ رایگشتی

    هاونیشتمانییانی به‌ڕێز
    دابینكردنی سه‌قامگیری و ئاسایش و روبه‌ڕوبونه‌وه‌ی مه‌ترسییه‌كان، پرۆسه‌یه‌كی هه‌واڵگریی ورده‌ و به‌ نهێنی و به‌شێوه‌ی به‌رده‌وام به‌ڕێوه‌ ده‌چێت‌. به‌ڵام چه‌ند رۆژێكه‌ له‌ په‌راوێزی هه‌ندێ پێشهات، هه‌ڵمه‌تێكی میدیایی له‌ دژی پرۆسه‌كانی سه‌قامگیری و ئاسایش ده‌ستی پێكردوه‌. هه‌ندێ لایه‌ن به‌ مه‌رامی زیان گه‌یاندن به‌ ناوبانگی ئاژانسی پاراستن و زانیاری / زانیاری و به‌ڕێوه‌به‌رایه‌تی گشتی دژه‌ تیرۆری سه‌ر به‌ ئاژانس، هه‌واڵی بێ بنه‌ما له‌سه‌ر ئه‌فسه‌ر و كارمه‌ندانی ئه‌م ده‌زگا تێكۆشه‌ره‌ بڵاو ده‌كه‌نه‌وه‌ و ده‌یانلكێنن به‌ هه‌ندێك كاری نه‌كراوه‌وه‌.

    ئه‌وه‌ دوپات ده‌كه‌ینه‌وه‌‌ كه‌ ئاژانسی پاراستن و زانیاری / زانیاری، خاوه‌نی ناوبانگی نیشتمانی و كوردستانییه‌، جێده‌ستی له‌ پاراستنی ئه‌زمونی حوكمڕانیی هه‌رێم و روبه‌ڕوبونه‌وه‌ی مه‌ترسییه‌كانی تیرۆر و سیخوڕی و تاواندا به‌رجه‌سته‌ و باڵایه‌. كادر و كارمه‌ندانی ئاژانس وله‌ ناویشیاندا پێشمه‌رگه‌ گیان له‌سه‌رده‌سته‌كانی دژه‌ تیرۆر، قاڵبوی خه‌باتی نیشتمانی و په‌روه‌رده‌كراوی دیسپلینی سه‌ربازین. پابه‌ندن به‌ یاسا به‌ركاره‌كانی په‌رله‌مان و حكومه‌تی هه‌رێمی كوردستان. له‌ چوارچێوه‌ی مافه‌كانی مرۆڤ و ئیتیكی پیشه‌ییدا ره‌فتار ده‌كه‌ن و ته‌نها رێ پێدراون ئه‌و ئه‌رك و فه‌رمانانه‌ جێبه‌جێبكه‌ن كه‌ ئاژانسی پاراستن و زانیاری / زانیاری له‌ پێناو دابینكردنی ئاسایشی نیشتمانیی هه‌رێمی كوردستان پێیان ده‌سپێرێت.

     له‌م سۆنگه‌یه‌وه‌، به‌ڕێوه‌به‌رایه‌تی گشتیی دژه‌ تیرۆر، به‌شێكه‌ له‌ شانازییه‌كی مێژویی و به‌رده‌وامی گه‌لی كوردستان. به‌شدارێكی به‌هێزی هاوپه‌یمانیی نێوده‌وڵه‌تییه‌ دژ به‌ تیرۆر، رۆڵی به‌رچاوی هه‌بوه‌ له‌ سه‌رخستنی جه‌نگی جیهانیی دژ به‌ تیرۆر و له‌ پێناو پاراستنی دیموكراسی و ئازادی و ئارامیی و مرۆڤایه‌تی قوربانیی داوه‌، و به‌ خوێنی شه‌هید و بریندار و شاره‌زایی و پشودرێژیی ئه‌فسه‌ره‌كانی، سه‌دان نه‌به‌ردی مێژویی پڕ شانازی بۆ گه‌له‌كه‌مان تۆمار كردوه‌.

    به‌م رونكردنه‌وه‌یه ئه‌وه‌ رایده‌گه‌یه‌نین كه‌ ‌ لێكۆڵینه‌وه‌ له‌سه‌ر گومانه‌كانی خراپ به‌كارهێنانی ده‌سه‌ڵات، یه‌كێكه‌ له‌ ئه‌ركه له‌ پێشینه‌كانی ‌ئاژانسی پاراستن و زانیاری / زانیاری‌ . دڵنیابن رێگه‌ ناده‌ین ناوی ئاژانس بۆ مه‌رام و به‌رژه‌وه‌ندیی تایبه‌تی هیچ كه‌سێك به‌كاربێت. به‌ڵێنتان پێ ده‌ده‌ین هه‌ركه‌سێك له‌ هه‌ر پله‌ و پایه‌یه‌كدا بوبێت تێوه‌گلابێت له‌ تاوان و كاری نایاسایی، ده‌ستگیر ده‌كرێت، راپێچی به‌رده‌م یاسا ده‌كرێت و رای گشتییش له‌ ئه‌نجامی لێكۆڵینه‌وه‌ و سزادانی‌‌ ئاگادار ده‌كرێته‌وه‌. هاوكات رێكاری یاسایی ده‌گیرێته‌ به‌ر به‌رامبه‌ر هه‌ر كه‌س و لایه‌نێك كه‌ بیه‌وێت به‌ بڵاوكردنه‌وه‌ی هه‌واڵی بێ بنه‌ما، ئه‌رك و ماندوبونی ئه‌فسه‌رانمان بخاته‌ ژێر پرسیار، و گێره‌شێوێنی بكات تا ناو و ناوبانگیان بزڕێنێت.

    وته‌بێژی سه‌رۆكی
    ئاژانسی پاراستن و زانیاری / زانیاری
    23-7-2021



هەواڵی پەیوەندیدار

هەواڵی زیاتر

زۆرترین بینراو


Copyright © 2020 All Rights Reserved Designed And Developed By AVESTA GROUP