هەڵبژاردنی پەرلەمانی عێراق لەمانگی ۲۰۲۱/۱۰، واقیعێكی تازەی هێنایە كایەوە. پێش هەموو شتێك بۆ هەر بكەرێكی سیاسی و چاودێرانی كایەكەش، ئەو واقیعە تازەیە بووەتە پێدراو، بووەتە فاكت و بەچار یان بەناچار پێویستە مامەڵەی لەگەڵدا بكەن.
ئەگەرچی زۆرجار گوێبیستی ئەوە دەبین كە هەندێ دەنگ و ڕەنگ، باس لەوە دەكەن گوایە ڕادەی دەنگدان و بەشداری خەڵك لەهەڵبژاردندا كەم بووە، بەو قسانە دەیانەوێت لە قورسایی دۆخە تازەكە كەم بكەنەوە، بەڵام پێویستە ئەو ڕاستییە بزانین كە حیزبە سیاسییەكان و بكەرانی سیاسی، پێویستە مامەڵە لەگەڵ واقیعدا بكەن، ئەوەش جێ بهێڵن بۆ توێژەران و مێژوونووسان كە ئایا ڕادەی بەشداری خەڵك چۆن بووە، بەرز بووە یان نا؟ چونكە ئەوە ئیشی حیزبی سیاسی نیە لەڕابردوودا بژی، بێگومان ئەوەندەیتر لەكاروان جێدەمێنێت و قەیرانەكانی قووڵتر دەبنەوە.
جەمسەرگیری سیاسیی ئەمجارە، گۆڕانكارییەكی چۆنایەتییە لەمۆدیلی حوكمدا، ڕەنگدانەوەی نەرمە هێزی سەردەمی بایدن و سەپاندنی مەرجە هەرێمایەتییەكانە بەسەر كامپی ئێرانیدا، ئەگەرچی تادێتە كوردستان ئەم مانایە، ئەم لێكەوتەیە كاڵتر دەبێتەوەو دادەبەزێت بۆ بۆ نێو گرێ كلاسیكییەكانی پێش ئەم هەڵبژاردنە، وەك لەدۆسیەی سەرۆككۆماردا دەیبینین.
بە دەربڕینێكی تر: ئەو مۆدیلە تازەیەی كەلەئێراقدا خەریكە دابڕانێك لەگەڵ ئیرسی كۆندا دروست دەكات، لەكوردستاندا لەگەڵ دۆسیە كۆنەكاندا موتروبە دەبێت و ئەو ئاسەوارە كاڵ دەبێتەوە. چونكە كوردستان ناتوانێت ئەو دابڕانە دروست بكات لەكاتێكدا پۆستەكانی ئێرەو بەغدا پێكداچوون و پەیوەندییان لەگەڵ یەكتردا هەیە و بە سیستەمی موقایەزە دانراون! وەك موقایەزەی پۆستەكانی سەرۆكایەتی هەرێمی و سەرۆكایەتی كۆماری ئێراق!.
لەبەر ئەوە، پێویستە لایەنە سیاسییەكانی كوردستان ژیرتربن لەوەی زیاتر لەكاروان دوابكەون، بەڵكو پێویستە ڕاستەوخۆ مامەڵە بكەن لەگەڵ ئەو واقیعەدا كە ئیستا جەمسەرگیری نوێ لەئێراق هەیە، پارتی نوێنەری هەرێمی كوردستان، حەلبوسی و هاوكارەكانی نوێنەری سوننە، موقتەدا نوێنەری شیعەیە! ئیدی لێرەوە دەست بە سیاسەت بكەن.
ئەوەی جێگەی سەرنجە و بووەتە خاڵی بەهێز و یاریدەدەر بۆ سەركەوتنی ئەم مۆدیلە تازەیە، ئەوەیە ئێران و ئەمریكا و وڵاتانی تری خاوەن هەژمونیش، بەم واقیعە تازەیە ڕازین و كاری لەگەڵ دەكەن، لەسەروی هەموویانەوە نەتەوە یەكگرتووەكان مامەڵەی لەگەڵدا دەكەن! هیچ بوارێك بۆ گۆڕینی ئەم جەمسەرگیرییە نەماوە، بۆیە كورتترین ڕێگە لە بەردەم حیزبە كوردییەكان، بەتایبەتی لەبەردەم یەكێتیی نیشتمانیدا بۆ ئەوەی زیاتر گۆشەگیر نەبێت، ئەوەیە هەر لەهەولێرەوە داخوازییەكانی خۆی لەنێو بەرنامەی پارتی جێبكاتەوە!.
سیناریۆی شاندی هاوبەشی نێوان یەكێتیی و پارتی، باشترین سیناریۆیە كە وادەكات ڕاستەوخۆ یەكێتیی لەپاڵ پارتیدا بەشداری لەدانوستانەكانی پێكهێنانی حكومەت بكات، دواتریش بگاتە ڕێككەوتن لەسەر پۆستی سەرۆككۆمار، ئیتر كاندیدەكە هەركەس بێت!.
یەكێتیی پێویستە ئەو ڕاستییە بزانێت كە هۆكاری هەبوون و كەڵەكەبوونی بڕێكی زۆر تێبینی لەسەر سەرۆكایەتیی “دكتۆر بەرهەم ساڵح” ئەوەیە كە لەسەرەتای دانانییەوە لەو پۆستەدا، نەتوانرا ڕەزامەندی پارتی بۆ بەدەستبهێنرێت، خۆ ئەگەر (بەرهەم ساڵح) كاندیدی هاوبەشی پارتی و یەكێتیی بوایە، بێگومان سەركەوتوودەبوو لەكارەكانیدا.
ئەوە لەكاتێكدایە كە پارتی لەخولی پێشوو، تازە لەژێر ئاسەوارەكانی ڕیفراندۆم دەردەچوو، ماندووبوو، ژمارەی ئەندامەكانیشی لەپەرلەمان كەمبوو، بەڵام توانی ئەو ڕاستییە بكاتە فاكت كە بەبێ ڕەزامەندی پارتی، ئەستەمە هیچ پۆستێكی سیاسی و ئیداری كوردی لەئێراق و هەرێمدا سەركەوتن بەدەست بهێنێت.
ئیستا واقیعەكە بۆ یەكێتیی قورسترە، هەم پارتی بەهێزترە تاڕادەی وەرگرتنی شەرعیەتی نوێنەرایەتیكردنی كورد لەئێراق، هەم شەرعیەتی هەڵبژاردن و ڕەزامەندی هەرێمایەتیش، بۆیە كورتترین ڕێگا بۆ یەكێتیی ڕازی كردنی پارتییە! نە سەفەری بەغدا و نەمامەڵەی فەنتازی لەگەڵ گەمەكانی ناو پەرلەمان و ئەرویقەكانی پێكهێنانی حكومەتدا.
زۆر سوپاس بۆ (ڕۆژنامەی هەولێر) ی بەڕێز.