بانگەوازێکی بەپەلە بۆ ساتێکی مێژوویی... بەرەو ئەنجوومەنێکی سیاسی یەکگرتووی کوردی لە بەغدا

 بەڕێز جەنابی سەرۆک نێچیرڤان بارزانی:

لە ساڵی 2003ەوە ئەزمونی عێراق سەلماندوویەتی کە سیاسەت تەنها یاری دەنگدان نییە، بەڵکو یاری هاوسەنگییە. ئەوەی خاوەنی زمانی یەکڕیزی بێت، کلیلی کاریگەری لە بەغدا بەدەستەوەیە. هەمووان شایەتحاڵی ئەوەن کە  بلۆکی شیعە ڕیزەکانی خۆی لە ژێر چەتری "چوارچێوەی هەماهەنگی"دا ڕێکخستووە،  بلۆکی سوننەش هەنگاوێکی لەو چەشنەی ناوە و ئەنجوومەنێکی یەکگرتووی سوننەیان دامەزراندووە،  تەنها بلۆکی کوردی بێ ئەنجومەنێکی یەکگرتوو ماوەتەوە، ئێستا کورد بێ دیدگای هاوبەشە، ئەم بۆشاییە سیاسییە نەک هەر بۆ ئێستا، بەڵکو هەڕەشەیەکی گەوورەشە بۆ داهاتوو .. 

دامەزراندنی ئەنجوومەنێکی سیاسی یەکگرتووی کوردی لە بەغدا بۆتە پێویستی؛ ئەنجومەنێک کە وەک ناوەندێکی ستراتیجی خزمەت بکات هەموو لایەنەکان لەسەر مێزێکی بازنەیی کۆبکاتەوە و هەڵوێستێکی یەکگرتووی کورد و دیدگایەکی ڕوون و ڕێبازێکی دانوستانکاری بەرپرسیارانە دروست بکات. ئامانج لەدرووستکردنی ئەو ئەنجوومەنە، نەهێشتنی تێڕوانین و جیاوازییەکان نییە، بەڵکو گۆڕینیانە بۆ هێزی ناوخۆیی. پەیوەندی بە ڕووبەڕووبوونەوە  نییە لەگەڵ بەغدا  بەڵکو لەسەر بنیاتنانی دیالۆگێکی بەردەوام و قووڵە کە مافە دەستوورییەکان زامن بکات و پرەنسیپی هاوبەشی نیشتمانی بپارێزێت، دووربێ لە گرژی و پارچەپارچەبوون!!

ئەو بانگەوازە لوکسێکی سیاسی نییە، بەڵکو ئەرکێکی مێژوویی و ئەخلاقییە. کەشوهەوای سیاسی ئێستای بەغدا چاوەڕێی دوودڵەکان ناکات، مێژووش لەو کەسانە خۆش نابێت کە درەنگ دەگەنە جێ ئەگەر ئەنجوومەنێکی سیاسی یەکگرتووی کوردی لە بەغدا دامەزرێت دەکرێت یەکێک بێت لە گۆڕانکارییە هەرە بەرچاوەکانی مێژووی حوکمڕانی کورد لە ساڵی 2003ەوە، نەک تەنیا وەک قەوارەیەکی سیاسی، بەڵکو وەک ساتێکی هۆشیاری مێژوویی نوێ کە تێدەگات کە یەکڕیزی دروشم نییە، بەڵکو دیدگایەکی ستراتیژییە لە سەختترین سەردەمدا.

ئەم بانگەوازە ،دەنگدانەوەی یادەوەری ئەو شەهیدانەیە کە، لە هەڵەبجە و گەرمیان و بادینان وبالیسان وڤەرەداغ، لەبەر کوردزوونیان ژیانیان لێسەنرایەوە، شەهیدان بۆ هەڵکردنی ئاڵای حزبی خۆیان بەخت نەکرد، بەڵکو بۆ پاراستنی کەرامەتی نیشتمان کردە قوربانی. ئەمڕۆ ئەرکی ئێمەیە  پارێزگاری لەخوێنی شەهیدان و فرمێسکی دایکە جەرگسووتاوەکان بکەین!! 

لە فەلسەفەی سیاسیدا دەوترێت: ناکۆکی لە سروشتی مرۆڤدا هەیە،  بەڵام توانای یەکخستنی خەڵک هونەری سەرکردەکانە.خۆشەختانە ئێوەش یەکێکن لەوکەسایەتییە دیارانەی کەشارەزای ئەو هونەرەن،، ئێستا تۆ تەنها  نوێنەری حیزبێک نیت، بەڵکو نوێنەری یادەوەریت. تۆ هێمای دەسەڵات نیت، بەڵکو هێمای هاوسەنگی و ئاشتییت. ئەمڕۆ سه ڕده می ئه ندازیاری سیاسییه که ئه وەی بەخوێنی شه هیدان هاتۆتە بەرهەم  بپارێزێت و دەرگای خۆشگوزەرانی بۆ نه وەکانی داهاتوو بکاتەوە، ئێمە- کوڕ و کچانی ئەم میللەتە- چاومان لە بنیاتنانی کوردستانێکی شایستەیە،. گەلەکەمان  ململانێی حزبی ناوێت؛ یەک مێز و یەک زمان و یەک خەونمان دەوێت. لە کاتێکدا چارەنووسی نەتەوەکانە جیاواز بن، بەڵام چارەنووسی سەرکردەکانە کە بە وردبینی سیاسیەوە، دەستکەوتەکان دەستکەوتەکان بپارێزن!

گەلان بە قسەو هوتاف و بانگەشە نەگەیشتوون بە شکۆمەندی خۆیان، بەتەنیا لەڕێی وتار و دروشمی قەبەوە نیشتمانیان بنیات نەناوە. بەڵکو لەڕێگای دیدێکی هاووبەشەوە بە ئامانجەکانیان گەیشتوون، ڕێگای پێشکەوتن تەنها بە یەک کلیل دەکرێتەوە، ئەویش کلیلی یەکێتی و دیدێکی هاوبەشە. مێژوو فێری کردووین کە دروشمی بێ پلان وەک ئاگری بێ سووتەمەنی وایە؛ ڕووناکییان بۆ چەند چرکەیەک دەدرەوشێتەوە و دواتر دەکوژێتەوە. بەڵام کاتێک ئیرادەکان یەکدەگرن، تەنانەت بێدەنگیش دەبێتە هێز و بیرۆکەیەک دەگۆڕێت بۆ چارەنووسێک کە بە ئیرادەی هۆشیارانەی نەوەکان لە قاڵب دەدرێت!!

 

جەنابی سەرۆک : 

ئێمە داوای موعجیزە ناکەین ،بەڵکو داوای بەرزکردنەوەی ئاڵای کوردستان لە سەرووی ئاڵای حیزبەکانەوە دەکەین، ،داوای گۆڕینی ناتەبایی ئەکەین بۆ فرەچەشنی، فرەچەشنی بۆ هێز و هێزیش بۆ یەکگرتوویی... چونکە تەنها بەم شێوەیە دەتوانین بەرگەی زریانەکان بگرێن!!
لە مێژووەوە فێر دەبین کە گەلان بەرگەیان نەگرتووە چونکە بەهێزترین بوون، بەڵکو لەبەر ئەوەی زانیویانە کەی لە خێڵە جیاوازەکانەوە بگۆڕدرێن بۆ دیدێکی یەکگرتوو. کوردیش تەنیا لە ڕێگەی یادەوەرییەوە بوونی خۆی ناپارێزێت، بەڵکو لە ڕێگەی توانای گۆڕینی ئازار بۆ پڕۆژە، شوناس بۆ داهاتوو، خوێن بۆ پەیامێک کە زەمەن ناتوانێت بیسڕێتەوە.دەگاتە سەربەخۆیی و خۆبوون!!

لەگەڵ ڕێزی بێ پایانم !

#عەتا_شەمێرانی