دواین هەواڵ

ئابوری‌

 9 کاتژمێر پێش ئێستا

وەزارەتی دارایی: لیستی مووچەی مانگی تشرینی دووەم ڕادەستی بەغدا کرا

ھەرێم نیوز

وەزارەتی دارایی و ئابووریی حکوومەتی هەرێمی کوردستان ڕایگەیاند، لیستی مووچەی مانگی تشرینی دووەمی فەرمانبەران و مووچەخۆران و ڕاپۆرتی تەرازووی پێداچوونەوەی مانگی تشرینی یەکەم ڕەوانەی بەغدا کرا و ڕادەستی فەرمانگەی ژمێریاریی وەزارەتی داراییی حکوومەتی فیدراڵ کرا.

ڕادەستکردنی لیستی مووچە و تەرازووی پێداچوونەوە بە بەغدا
ئەمڕۆ یەکشەممە، ٢٢ی تشرینی دووەمی ٢٠٢٦، ڕاگەیاندنی وەزارەتی دارایی و ئابووریی حکوومەتی هەرێمی کوردستان لە ڕاگەیەندراوێکدا ئاشکرای کرد، بەرەبەیانی ئەمڕۆ لیستی مووچەی مانگی تشرینی دووەمی فەرمانبەران و مووچەخۆرانی هەرێمی کوردستان، هاوکات لەگەڵ ڕاپۆرتی تەرازووی پێداچوونەوەی خەرجی و داهاتەکانی مانگی تشرینی یەکەم، لەلایەن تیمی تەکنیکیی وەزارەتی دارایی و ئابوورییەوە ڕەوانەی شاری بەغدا کرا.

بەگوێرەی ڕاگەیەندراوەکە، کەمێک لەمەوبەر هەردوو لیست و ڕاپۆرتەکە بە فەرمی ڕادەستی فەرمانگەی ژمێریاریی وەزارەتی داراییی حکوومەتی عێراقی فیدراڵ کراون، بە مەبەستی دەستکردن بە ڕێکارەکانی وردبینی و ناردنی شایستە دارایییەکانی مووچەخۆرانی هەرێمی کوردستان.



Copyright © 2020 All Rights Reserved Designed And Developed By AVESTA GROUP