هەرێم نیوز
ئەندامێکی لیژنەی دارایی لە پەرلەمانی عێراق وردەکاریی کۆبوونەوەی لەگەڵ وەزیری دارایی فیدراڵ ئاشکرا دەکات و جەخت لەسەر جیاکردنەوەی یەکجارەکیی مووچەی فەرمانبەرانی هەرێمی کوردستان لە سەرجەم ناکۆکییە سیاسی و داراییەکان دەکاتەوە.
تاوتوێکردنی ڕەشنووسی بودجە و پشکی هەرێمی کوردستان
ئیخڵاس دلێمی، ئەندامی لیژنەی دارایی پەرلەمانی عێراق، بڵاوی کردەوە کە لەگەڵ فالح ساری، وەزیری دارایی فیدراڵ کۆ بووەتەوە بە مەبەستی تاوتوێکردنی گرنگترین بڕگە و کێشەکانی تایبەت بە ڕەشنووسی بودجەی گشتیی فیدراڵی.
ئاماژەی بەوەش کرد کە لە میانی کۆبوونەوەکەدا گرنگترین ئەو بڕگانەی خستووەتە ڕوو کە پەیوەستن بە شایستەی داراییی سەرجەم پارێزگاکانی عێراق، و لە پێشەنگی تەوەرەکانی گفتوگۆکەشدا پرسی پشکی هەرێمی کوردستان لە بودجەدا بووە بە مەبەستی دۆزینەوەی میکانیزمێک بۆ گەیشتن بە ڕێککەوتنێک کە ڕەزامەندیی هەموو لایەنەکان بە دەست بهێنێت.
چارەسەرکردنی کێشەی "خەرجیی فیعلی" و خەرجییە سیادییەکان
لە بەشێکی دیکەی کۆبوونەوەکەدا، ئیخڵاس دلێمی جەختی لە پێویستیی یەکلاییکردنەوەی بنەڕەتیی پشکی هەرێمی کوردستان کردووەتەوە و ئەو گرفت و ئاستەنگە گەورانەی بۆ وەزیری دارایی ڕوون کردووەتەوە کە بەهۆی بڕگەی ناسراو بە "خەرجیی فیعلی" لەسەر شایستە داراییەکانی هەرێم دروست بوون.
هاوکات گفتوگۆ لەسەر پێویستیی کەمکردنەوەی خەرجییە سیادییەکان کراوە، بە شێوەیەک تەنیا ئەو بڕگانە لە خۆ بگرێت کە بە ڕوونی لە دەستووردا ئاماژەیان پێ کراوە، بە بێ ئەوەی هەڵاوسانی نادەستووری و ناپێویستیان تێدا بکرێت.
جیاکردنەوەی مووچە لە ململانێکان و هەڵوێستی وەزیری دارایی
دلێمی سوور بووە لەسەر گرنگیی جیاکردنەوەی یەکجارەکیی دۆسیەی مووچەی فەرمانبەرانی هەرێمی کوردستان لە سەرجەم کێشە و بابەتە داراییەکانی دیکە، بۆ ئەوەی خەرجکردنی مووچەکان مسۆگەر و بەردەوام بێت، هاوشێوەی مووچەی سەرجەم هاووڵاتییان لە پارێزگاکانی دیکەی عێراقدا.
لە لایەن خۆیەوە، فالح ساری، وەزیری دارایی عێراق، پێداگری و پابەندبوونی خۆی بە خەرجکردن و دابینکردنی مووچەی فەرمانبەرانی هەرێمی کوردستان دووپات کردەوە و ئاماژەی بەوە کرد کە دانوستان و هەوڵەکان بەردەوامن تاوەکوو دادپەروەری لە نێوان سەرجەم چین و توێژەکانی گەلی عێراقدا بێتە کایەوە.