هەرێم نیوز
دۆناڵد ترەمپ، سەرۆکی ویلایەتە یەکگرتووەکانی ئەمریکا لە لێدوانێکی ڕۆژنامەوانیی نوێدا تەقینەوەیەکی سیاسیی گەورەی لەسەر ئاستی جیهان دروستکرد و ڕایگەیاند، کۆماری ئیسلامیی ئێران بە فەرمی ڕازی بووە بەوەی چەکی ئەتۆمی بەدەست نەهێنێت.
ئەمڕۆ چوارشەممە (٣ی حوزەیرانی ٢٠٢٦)، دۆناڵد ترەمپ جەختی کردەوە کە تاران ڕەزامەندیی نیشانداوە لەسەر ڕاگرتنی پڕۆژەی چەکی ئەتۆمی، هاوكات ئاشکرای کرد کە موجتەبا خامنەیی، ڕێبەری باڵای ئێران، بە شێوەیەکی ڕاستەوخۆ و ناوبەناو لە پڕۆسەی دانوستانە نهێنی و ئاشکراکان لەگەڵ ئیدارەی ئەمریکادا بەشدارە.
سەرۆکی ئەمریکا گەشبینیی خۆی نیشاندا و گوتی: "دۆخی پەیوەست بە ئێران بە خێرایی پەرە دەستێنێت و بەرەو ئاراستەیەکی 'زۆر باش' هەنگاو دەنێت." کە ئەمەش ئاماژەیەکی ڕوونە بۆ گەیشتن بە لێکتێگەیشتنی ستراتیژی لە نێوان واشنتن و تاراندا دوای ماوەیەکی درێژ لە گرژیی سەربازی.
دۆناڵد ترەمپ پێشبینی کرد بە کۆتاییهاتنی یەکجاریی شەڕ و ئاڵۆزییەکان لەگەڵ ئێران و گەیشتن بە ڕێککەوتنی کۆتایی، نرخی سووتەمەنی و بەنزین لە بازاڕەکانی جیهاندا بە شێوەیەکی بەرچاو و مێژوویی دابەزێت، ئەمەش وەک ئاماژەیەک بۆ بووژانەوە و ئاساییبوونەوەی باری ئابووریی جیهانی دوای شڵەژانە گەورەکانی ئەم دواییە.
لە بەشێکی دیکەی قسەکانیدا، سەرۆکی ئەمریکا بێزاری و نیگەرانیی قووڵی خۆی لە بەردەوامیی ململانێ و پێکدادانە سەربازییە خوێناوییەکانی نێوان ئیسرائیل و حزبوڵڵای لوبنان دەربڕی. ترەمپ جەختی لەوە کردەوە کە کاتی ئەوە هاتووە کۆتایی بەو گرژی و وێرانکارییانە بهێنرێت و زەمینە بۆ ئاشتییەکی بەردەوام لە ڕۆژهەڵاتی ناوەڕاستدا خۆش بکرێت.