هەرێم نیوز

دۆناڵد ترەمپ، سەرۆکی ویلایەتە یەکگرتووەکانی ئەمریکا ڕایدەگەیەنێت، کە هێزەکانیان دەستیان بەسەر کەشتییەکی ئێرانیدا گرتووە کە دیاریی چینی تێدابووە، هاوکات ئاشکراشی دەکات کە بەتەواوی ئامادەن بۆ هێرشکردنە سەر ئێران و بە شێوەیەکی ناڕاستەوخۆش ڕژێمی ئەو وڵاتەیان گۆڕیوە.

ئەمڕۆ سێشەممە، 21ـی 4ـی 2026، دۆناڵد ترەمپ، سەرۆکی ئەمریکا لە چاوپێکەوتنێکدا لەگەڵ تۆڕی (سی ئێن بی سی - CNBC) بڵاویکردەوە، کە لە ئێستادا ئەمریکا لە پێگەیەکی بەهێزی دانوستاندایە و گەمارۆ ئابوورییەکانیش بۆ سەر تاران بەتەواوی سەرکەوتوو بوون. 

ئاماژەی بەوەش کرد، کە ئێران هیچ چارەیەکی دیکەی لەبەردەمدا نەماوە جگە لە ناردنی شاندێک بۆ دانوستان، پێشی وایە کە ئەم هەنگاوە دەبێتە هۆی گەیشتن بە ڕێککەوتنێکی نایاب.

سەرۆکی ئەمریکا سەبارەت بە کەشتییە دەستبەسەرکراوەکە ڕایگەیاند: "کەشتییەکی ئێرانیمان لەگەڵ چەند دیارییەکی چینیدا گرتووە، لە کاتێکدا پێم وابوو لەگەڵ سەرۆکی چین لێکتێگەیشتنمان هەیە."

 هەروەها سەبارەت بە دەسەڵاتدارانی تاران وتی: "ئێمە مامەڵە لەگەڵ کەسانی باشدا ناکەین، بەڵام زۆر بەسەرکەوتوویی مامەڵەیان لەگەڵدا دەکەین. ئێمە زۆر لە ڕژێمی ئێران سەرسەختترین و مامەڵەکردن لەگەڵماندا قورسترە."

لە بەشێکی دیکەی چاوپێکەوتنەکەدا، ترەمپ هۆشداریی دا کە کاتی زۆریان لەبەردەستدا نەماوە بۆ کۆتاییهاتنی ئاگربەستەکە و جەختی کردەوە: "چەکەکانمان بەباشی پڕن لە تەقەمەنی و زۆر ئامادەین. خۆم و سوپاکەشمان ئامادەین بۆ ئەوەی هەنگاو دژی ئێران بگرینە بەر."

 ئاشکراشی کرد کە ئێران لە هەوڵی گواستنەوەی مووشەکەکاندایە، چونکە ئەمریکا زۆربەیانی لەناوبردووە. وتیشی: "ئێمە ئەم ماوەیەی ئاگربەستەمان بۆ پڕکردنەوەی کۆگاکانی خۆمان بەکارهێناوە، و پێدەچێت ئێرانیش هەمان کاری کردبێت."

لە کۆتایی قسەکانیدا، ترەمپ ستایشی هێزەکانی کرد و ڕایگەیاند: "سوپاکەمان بەڕاستی سەرسوڕهێنەرە و ئەوەی لە ئێران بەدەستمان هێناوە باوەڕپێنەکراوە.

 ئێمە هێزە دەریایی و ئاسمانییەکانی ئێران و سەرکردەکانیمان لەناوبرد، بەڵام سەرکردە نوێیەکان لۆژیکیترن." جەختیشی لەوە کردەوە کە هەر ئێستا بە شێوەیەکی ناڕاستەوخۆ ڕژێمی ئێرانی گۆڕیوە.