هەرێم نیوز
دوای بڵاوبوونەوەی هەواڵی بێسەروشوێنبوونی ڕۆژنامەنووسێکی ئەمریکی بە ناوی (شێڵی کێتلۆسۆن) لە ناوچەی شەقامی سەعدوونی ناوەڕاستی بەغدا، وەزارەتی ناوخۆی عێراق ڕاگەیەندراوێکی بەپەلەی بڵاوکردەوە و تێیدا دەستگیرکردنی یەکێک لە تۆمەتبارانی ڕفاندنەکەی ڕاگەیاند.
بەپێی زانیارییە ئەمنییەکان، کێتلۆسۆن کە وەک ڕۆژنامەنووسێکی سەربەخۆ بۆ ئاژانسی هەواڵی ئیتاڵی و ماڵپەڕی ئەلمۆنیتەر کاری دەکرد، لە نزیک هۆتێل بەغدا ڕفێندراوە. دەستبەجێ هێزە ئەمنییەکان دەستیان بە ئۆپەراسیۆنێکی چڕ کردووە و لە ئەنجامی ڕاوەدوونانێکی مەیدانیدا، توانیویانە ئۆتۆمبێلێکی ڕفێنەرەکان گەمارۆ بدەن.
وەزارەتی ناوخۆ ئاماژەی بەوە کردووە کە لە کاتی هەوڵی هەڵاتندا ئۆتۆمبێلی ڕفێنەرەکان وەرگەڕاوە و هێزە ئەمنییەکان توانیویانە یەکێک لە تۆمەتبارەکان دەستگیر بکەن و دەست بەسەر ئۆتۆمبێلەکەشدا بگرن. لە ئێستادا لێکۆڵینەوەکان بەردەوامن بۆ ئاشکراکردنی شوێنی ڕۆژنامەنووسە ڕفێندراوەکە و دەستگیرکردنی تۆمەتبارانی دیکەی ڕووداوەکە.
حکومەتی عێراق جەختی کردەوە کە ڕێگە بە هیچ هەوڵێک نادات بۆ تێکدانی سەقامگیریی وڵات و بە ئامانجگرتنی میوانە بیانییەکان، و هەموو ڕێکارێکی پێویست دەگرێتە بەر بۆ ڕووبەڕووبوونەوەی یاساشکێنان.