هەرێم نیوز
لەگەڵ بەردەوامیی ئاگر و لێکەوتەکانی جەنگی ئێستا، ڕاپۆرتە نێودەوڵەتییەکان تیشک دەخەنە سەر یەکێک لە گەورەترین مەترسییە شاراوەکان لە قووڵایی خاکی ئێراندا، ئەویش هەبوونی پتر لە ٤٤٠ کیلۆگرام یۆرانیۆمی پیتێنراوی ئاستی ٦٠٪یە، کە بەپێی خەمڵاندنە سەربازییەکان بەسە بۆ دروستکردنی ١٠ بۆ ١٢ بۆمبی ئەتۆمی.
١. گۆڕانی ستراتیژی دوای خامنەیی
دوای کوشتنی عەلی خامنەیی، ڕێبەری پێشووی ئێران، نیگەرانییە جیهانییەکان گەیشتوونەتە لوتکە. خامنەیی خاوەنی فتوایەکی ئایینی بوو بۆ قەدەغەکردنی چەکی ئەتۆمی، بەڵام ئێستا چاودێران پێیان وایە سەرکردە نوێیەکانی ئێران چیتر پابەندی ئەو فتوا و سنوورانە نابن و جەنگەکە بەرەو "تونێلە ئەتۆمییەکان" دەبەن.
٢. "بیکاکس"؛ قەڵا ئەتۆمییە نوێیەکەی ژێر زەوی
زانیارییە هەواڵگرییەکانی ئەمریکا و ئیسرائیل ئاماژە بەوە دەدەن کە تاران مجمەعێکی ئەتۆمیی زۆر قووڵی لە ناو جەرگەی کێوی "بیکاکس" لە نێزیک ناوچەی نەتەنز دروست کردووە. ئەم بنکەیە بە جۆرێک پارێزراوە کە تەنانەت بۆردومانی چڕی ئاسمانیش ناتوانێت زیانی پێ بگەیەنێت، ئەمەش وای کردووە ئێران بە دڵنیاییەوە پڕۆسەی پیتاندنی یۆرانیۆمی تێدا بەردەوام بکات.
٣. ٤٤٠ کیلۆگرامەکە لە کوێیە؟
تۆڵسی گابارد، بەڕێوەبەری هەواڵگریی ئەمریکا، پێشتر ڕایگەیاندبوو کە واشنتۆن شوێنی وردی ئەو ٤٤٠ کیلۆگرامە دەزانێت. شیکارییەکان باس لەوە دەکەن کە ئەم بڕە یۆرانیۆمە لە ناو ١٨ بۆ ٢٠ حاویەی کانزایی بچووکدا دابەش کراوە (هەر یەکەیان بەقەد بوتڵێکی ئۆکسجینی غەواسی)، ئەمەش وای کردووە شاردنەوە و گواستنەوەیان لە ناو تونێلەکاندا زۆر ئاسان بێت و دەستکەوتنیان لەلایەن هێزە دەرەکییەکانەوە "مەحاڵ" بێت.
٤. مۆتەکەی "چنگی هەڵۆ" و مەترسییەکانی دەستێوەردان
هەرچەندە ئەمریکا هێزی تایبەتی (Delta Force) بۆ مامەڵەکردن لەگەڵ ماددە ئەتۆمییەکان هەیە، بەڵام پێنتاگۆن باش دەزانێت کە چوونە ناو قووڵایی خاکی ئێران بۆ ڕفاندنی ئەم یۆرانیۆمە مەترسییەکی یەکجار گەورەیە. شکستی ئۆپەراسیۆنی "چنگی هەڵۆ" لە ساڵی ١٩٨٠ هێشتا وەک وانەیەکی تاڵ لە مێژووی سوپای ئەمریکادا ماوەتەوە، بۆیە هەر هەوڵێکی لەو شێوەیە ڕەنگە جەنگەکە بەرەو کارەساتێکی ئەتۆمیی جیهانی بەرێت.
پوختەی ڕاپۆرتەکە:
• مەترسیی نێزیک: ٤٤٠ کیلۆگرام یۆرانیۆمی پیتێنراو (ئاستی ٦٠٪).
• ئامانجی ئێران: بەکارهێنانی یۆرانیۆم وەک کارتی فشار لە دانوستانەکان یان دروستکردنی بۆمب لە کاتی توندبوونی جەنگ.