هەرێم نیوز
ئەمڕۆ شەممە، ٢٨ی شوباتی ٢٠٢٦، عەباس عێراقچی، وەزیری دەرەوەی ئێران، لە پەیوەندییەکی تەلەفۆنیی بەپەلەدا لەگەڵ فوئاد حوسێن، وەزیری دەرەوەی عێراق، دوایین هەڵوێستی وڵاتەکەی سەبارەت بە پەرەسەندنە سەربازییەکان ڕاگەیاند. عێراقچی جەختی کردەوە کە ئێران بڕیاریداوە سەرجەم بنکە سەربازییەکانی ئەمریکا لە ناوچەکەدا بکاتە ئامانج وەک وەڵامێک بۆ هێرشە ئاسمانییەکانی واشنتن و تەلئەبیب.
بەپێی ڕاگەیەندراوێکی فەرمیی وەزارەتی دەرەوەی عێراق، عێراقچی دڵنیایی داوەتە بەغدا کە هێرشەکانی ئەوان وڵاتانی ناوچەکە ناکاتە ئامانج، بەڵکو تەنیا بنکە و دامەزراوە سەربازییەکانی ئەمریکا دەپێکن. ئەم لێدوانە لە کاتێکدایە کە هەر ئەمڕۆ و لە وەڵامی هێرشە هاوبەشەکانی ئەمریکا و ئیسرائیل، ئێران چەندین بنکەی سەربازیی ئەمریکای لە وڵاتانی کوێت، قەتەر و ئیمارات بە موشەکی بالیستی پێکاوە.
وەزیری دەرەوەی ئێران دووپاتی کردووەتەوە کە وڵاتەکەی بەردەوام دەبێت لە بەرگریکردن لە خۆی و ڕێگە نادەن هیچ بنکەیەکی ئەمریکی لە ناوچەکەدا بە ئارامی بمێنێتەوە ئەگەر هێرشەکان بۆ سەر خاکی ئێران بەردەوام بن. ئەم پەرەسەندنە ترس و دڵەڕاوکێیەکی زۆری لە ناوخۆی عێراق و وڵاتانی کەنداو دروست کردووە، بەتایبەت کە ئێستا ئاسمانی زۆربەی ئەم وڵاتانە بە ڕووی گەشتە مەدەنییەکاندا داخراوە.