هەرێم نیوز
لە ئەنقەرە، ئەردۆغان پێشوازی لە حەسەن شێخ مەحمود کرد و لە کۆنگرەیەکی ڕۆژنامەوانیدا وتی: ناسینی سۆماڵیلەند لەلایەن ئیسرائیلەوە رەتدەکەینەوە. لای خۆیەوە حەسەن شێخ مەحمود سوپاسی پشتیوانییەکانی تورکیای کرد بۆ پاراستنی یەکپارچەیی خاکی وڵاتەکەی و وتی: هەڵوێستە دژبەرییەکانی ناتانیاهۆ قبوڵکراو نین.
تورکیا یەکێکە لە هاوپەیمانە ستراتیژییەکانی سۆماڵ و گەورەترین بنکەی سەربازی خۆی لە دەرەوەی وڵات لە موقادیشۆ پایتەخت دامەزراندووە. ئەنقەرە نەک تەنها لە ڕووی سەربازی، بەڵکو لە ڕووی مرۆیی و ئابووریشەوە دەستێکی باڵای لە سۆماڵدا هەیە.
ئەمەش لە کاتێکدایە چەند ڕۆژ پێش، سوماڵیلاند لە وڵاتی سوماڵ جیا بووەوە و سەربەخۆبوونی خۆی راگەیاند، بنیامین ناتانیاهو، سەرۆك وەزیرانی ئیسرائیل، بە فەرمی سوماڵیلاندی وەكوو وڵات ناساند، بەمەش ئیسرائیل تاكە وڵاتە لە جیهاندا ئەو شوێنەی وەكوو وڵات ناساندووە، كاردانەوە جیهانییەكانیش بەردەوامە.
• کێشەی سۆماڵیلەند (کە هەرێمێکی جیابووەوەیە لە سۆماڵ) لە ساڵی ١٩٩١ـەوە بەردەوامە، بەڵام تا ئێستا هیچ وڵاتێک بە فەرمی نەی ناسیوە. هەوڵەکانی ئیسرائیل بۆ نزیکبوونەوە لە سۆماڵیلەند لە کاتێکدایە کە تورکیا و سۆماڵ ڕێککەوتنێکی نوێی بەرگری دەریاییان واژۆ کردووە بۆ پاراستنی کەناراوەکانی سۆماڵ، ئەمەش وەک وەڵامێک بۆ هەر هەوڵێکی جیابوونەوە یان دەستوەردانی دەرەکی.
• هاتنە ناوەوەی ئیسرائیل و ئەسیوپیا: ململانێکان کاتێک قووڵتر بوونەوە کە ئەسیوپیا ڕێککەوتنێکی لەگەڵ سۆماڵیلەند واژۆ کرد بۆ دەستگەیشتن بە دەریای سوور لە بەرامبەر ناسینی سەربەخۆیی ئەو هەرێمە. ئیسرائیلیش بەهۆی پێگەی ستراتیژی سۆماڵیلەند لەسەر کەنداوی عەدەن، دەیەوێت لەو ناوچەیەدا پێگەی هەبێت، ئەمەش تورکیای نیگەران کردووە چونکە نایەوێت ڕکابەرەکانی لەو ناوچە هەستیارەدا جێپێیان توند بێت.
• ڕێککەوتنی بەرگری: لە سەرەتای ساڵی ٢٠٢٤دا، تورکیا و سۆماڵ ڕێککەوتنێکی ١٠ ساڵەیان واژۆ کرد کە بەپێی ئەو ڕێککەوتنە تورکیا پارێزگاری لە کەناراوە دەریاییەکانی سۆماڵ دەکات و هێزی دەریایی ئەو وڵاتە بونیاد دەنێتەوە، ئەمەش وەک وەڵامێکی ڕاستەوخۆ بوو بۆ هەوڵەکانی ئەسیوپیا و هاوپەیمانەکانی لە ناوچەکەدا.